យោងតាមការចុះផ្សាយពីសារព័ត៌មាន Mirror បានបង្ហាញឱ្យដឹងថា ក្លិប Manchester City បានឈានដល់កិច្ចព្រមព្រៀងជាមួយក្លិប Barcelona ក្នុងការលក់ Joao Cancelo ជាអចិន្ត្រៃយ៍។
ជាក់ស្តែង Cancelo ជាកីឡាករម្នាក់ ក្នុងចំណោមកីឡាករដែលត្រូវបានក្លិប Barca ចុះហត្ថលេខានាំយកមក នៅរដូវក្តៅនេះ ស្របពេលខ្សែការពាររូបនេះ បានបង្ហាញភាពលេចធ្លោភ្លាមៗសម្រាប់ក្រុម ដោយរួមចំណែករកបាន ២គ្រាប់រួចទៅហើយ ។
យ៉ាងណាមិញ ក្លិប Barca ត្រូវបានគេរាយការណ៍ថា បានចរចាជាមួយក្លិប Man City រួចរាល់ហើយ ជុំវិញការផ្ទេរសម្រាប់ Cancelo ជាអចិន្ត្រៃយ៍ បន្ទាប់ពីបានមើលឃើញពីសមត្ថភាពរបស់ខ្សែការពារស្លាបស្តាំរូបនេះ។
មិនតែប៉ុណ្ណោះ បើតាម Mirror បានចុះផ្សាយថា ក្លិប Man City បានយល់ព្រម ក្នុងការលក់ខ្សែការពាររូបនេះ ក្នុងតម្លៃ ២៤,៣លានផោន នៅក្នុងទីផ្សារដោះដូរកីឡាករ នារដូវក្តៅខាងមុខ។ បច្ចុប្បន្ន Cancelo កំពុងលេងឱ្យក្លិប Barca ក្នុងលក្ខខណ្ឌខ្ចីជើង ប៉ុន្តែកីឡាករខ្លួនឯងផ្ទាល់ហាក់មានចិត្តចង់បន្តលេងឱ្យនៅទីនេះ រយ:ពេលយូរទៅមុខទៀត ៕