ខណៈនេះដូចបានឃើញស្ថានភាព Kalvin Phillips ជាមួយក្លឹបសំពៅមាស Manchester City ហាក់មិនអំណោយផលឡើយ ត្រង់មើលឃើញការខ្សត់ឱកាសបង្ហាញខ្លួន ក្រោមការដឹកនាំដោយអ្នកចាត់ការលោក Pep Guardiola នារដូវកាល ២០២៣/២៤។
City បានយកលុយ ៤២ លានផោន ទៅថ្ពក់ចេញ Phillips ពី Leeds United កាលរដូវក្តៅឆ្នាំ ២០២២ ហើយរដូវកាលមុនក៏ជាផ្នែកមួយជួយក្លឹបលើកពាន ៣ នៅរដូវកាលទោលដែរ ដល់តែចូលពេលចុងក្រោយនេះ គេទើបតែទទួលបានឱកាសបង្ហាញខ្លួន ៤ ប្រកួតគត់ ខណៈកីឡាករដទៃទូទៅចូល ១០ ប្រកួតក៏មាន។
ក៏មានដំណឹងថា Phillips ហាក់ត្រូវបានសម្លឹងឃើញពីក្រសែភ្នែកក្លឹបធំនៅខាងក្រៅ ជាក់ស្តែងគឺ Liverpool ជាក្លឹបមួយក្នុងចំណោមក្លឹបអស់នោះ ព្រោះបានអនុញ្ញាតឲ្យ Fabinho, Jordan Henderson និង James Milner ចាកចេញ តែមិនទាន់រកបានអ្នកជំនួសពោរពេញដោយគុណភាពជាក់លាក់។
ផ្សេងទៀតមាន Newcastle United ដែលតម្រូវស្វែងរកកម្លាំងថ្មីមកជួយ បន្ទាប់តែ Sandro Tonali ត្រូវបានពិន័យឈរជើងក្រៅទីលានរយៈពេល ១០ ខែ។ ខណៈ Fulham ឯណោះ ក៏សម្លឹងដែរ និង Tottenham Hotspur ជាក្លឹបចុងក្រោយ ដែលកំពុងក្រវែលស្ថានការណ៍។
គួរឲ្យដឹងដែរថា បញ្ជាក់កន្លងមកអំពីចំណាប់អារម្មណ៍គ្រូ នៅតែសរសើរគុណភាពកីឡាករអង់គ្លេស ហើយថានឹងព្យាយាមផ្តល់ពេលវេលាលើទីលានសម្រាប់គេតាមដែលអាចធ្វើទៅបាន។ នេះបើតាមហាងឆេងតម្លៃខ្លួនត្រូវចាកចេញពិតមែន គេអាចនាំឲ្យ City ត្រូវខាតបង់ជិតពាក់កណ្តាល៕