ក្លិបអ៊ីតាលី Juventus បានបំពេញការចុះហត្ថលេខាលើខ្សែការពារ Tiago Djalo ពីក្លិប បារាំង Lille ក្នុងតម្លៃ ៣,៦លានអឺរ៉ូ បូករួមទាំងថ្លៃចំណាយផ្សេងៗទៀត ដែលតម្លៃអាចកើនឡើងដល់៥,១ លានអឺរ៉ូ។
កីឡាករសញ្ជាតិព័រទុយហ្កាល់ វ័យ ២៣ ឆ្នាំ បានចុះហត្ថលេខាលើកិច្ចព្រមព្រៀង រហូតដល់ចុងបញ្ចប់នៃរដូវកាល ២០២៥-២៦ ។
Tiago Djalo ត្រូវបាន Juventus ចាប់អារម្មណ៍នាំយកមកចូលរួម ដោយមើលឃើញពីទម្រង់លេងរបស់គេ ដែលចូលចិត្តវាយលុក និងមានកាយសម្បទារឹងមាំ ប៉ុន្តែក្នុងពេលជាមួយគ្នានោះ គេមានសមត្ថភាពខ្លាំងក្នុងការរក្សាបាល់ផងដែរ។
កីឡាករមានកម្ពស់ដល់១,៩០ម៉ែត្ររូបនេះ បានដុះដាលចេញពីក្លិបព័រទុយហ្កាល់ Sporting CP ហើយរូបគេធ្លាប់បានចូលរួមជាមួយក្លិបធំៗផ្សេងទៀតដូចជា AC Milan និង Lille។
រូបគេក៏បានរួមចំណែកឈ្នះពានរង្វាន់ Ligue 1 និង Trophée des Champions នៅរដូវកាល ២០២០-២១ ជាមួយ Lille មុនផ្លាស់មកចូលរួមជាមួយក្លិបរហស្សនាមសេះបង្កង់នេះ៕