ក្លឹបសំពៅមាស Manchester City បានឈានដល់កិច្ចព្រមព្រៀងចុះហត្ថលេខាកក់ទុកជាមុន នូវវត្តមានកីឡាករចំណូលថ្មី Savio ពីក្លឹបបារាំង Troyes ក៏ស្ថិតក្រោមសម្ព័ន្ធតែមួយនៃ City Football Group (CFG)។ យ៉ាងណាបច្ចុប្បន្នគេក៏កំពុងរួមជើងក្នុងលក្ខខណ្ឌខ្ចីជើងរយៈពេលខ្លីនៅ Girona ក្នុងប្រទេសអេស្ប៉ាញ។
យុវជនវ័យ ១៩ ឆ្នាំ រាប់ថាជាសមាជិកឆ្លងកាត់ចុះឡើងនៃសម្ព័ន្ធ CFG តែមួយច្រើនលើកច្រើនសារ ហើយបើតាមប្រភពគួរឲ្យទុកចិត្ត Fabrizio Romano ចុះផ្សាយ គឺគេរង់ចាំតែដល់ថ្ងៃស៊ីញ៉េកុងត្រាប៉ុណ្ណោះ សឹមប្រកាសផ្លូវការ អំពីការផ្ទេរទៅចូលរួមក្នុងប្រទេសអង់គ្លេស នាចុងខែមិថុនា ឆ្នាំ ២០២៤ នាបិទរដូវកាលនេះ។
មុនការសម្រេចរបស់ City ដើមឡើយនោះ ក៏មានក្លឹបធំៗនៅអាល្លឺម៉ង់ និងក្លឹបរួមលីគ Premier League មួយចំនួន លេចលឺចង់បានគេទៅចូលរួមដូចគ្នា បន្ទាប់មើលឃើញគុណភាពដ៏ល្អនៅតំបន់ខាងលើ ជាមួយការបង្ហាញខ្លួន ២៣ ប្រកួត ក៏អាចរកបាន ៥ គ្រាប់និង Assist ៧ លើក ជាតួលេខល្អបំផុតហើយសម្រាប់យុវជនអាយុល្បាក់នោះ។
គួរឲ្យដឹងដែរថា Savio បានចាកចេញពី Atletico Mineiro មកចូលរួមនៅរដូវក្តៅ ឆ្នាំ ២០២២ ជាមួយក្លឹប Troyes ក្នុងតម្លៃ ៦,៥ លានអឺរ៉ូ។ មិនមានការបញ្ជាក់ច្បាស់អំពីហាងឆេងតម្លៃថ្មី តែជឿថា ក៏មិនប៉ះពាល់ចំណូលរបស់ក្លឹបអង់គ្លេសខ្លាំងដែរ ត្រង់លទ្ធភាពនៃការចរចាយកតម្លៃទាប ងាយនឹងកើតមានដល់ពួកគេនាមជាសម្ព័ន្ធតែមួយ៕