កន្លងមកត្រកូលគ្រួសារ The Glazers ដែលជាម្ចាស់ក្លឹប Manchester United បានដាក់លក់ក្លឹបនៅ Premier Legaue តាំងខែវិច្ឆិកា ឆ្នាំ ២០២២ ហើយមកទល់ពេលចុងក្រោយ ក៏ល្ហិចល្ហៀងដំណឹងខាងភាគីធំៗជាច្រើនចង់បាន ដូចសេដ្ឋីនៅប៉ែកអឺរ៉ុប អាមេរិក និងសូម្បីតែមជ្ឈិមបូព៌ា។
ទោះជាយ៉ាងណាបើតាមសារព័ត៌មាន The Sun ចុះផ្សាយ ខាងព្រះអង្គម្ចាស់ Sheikh Jassim របស់ប្រទេសកាតា ហាក់ឈានដល់កិច្ចព្រមព្រៀងបញ្ចប់ ១០០ ភាគរយ ជាមួយតម្លៃទិញយក ៦ ពាន់លានផោន។ គ្រប់យ៉ាងនឹងប្រកាសផ្លូវការ អំពីការចូលកាន់តំណែងម្ចាស់ថ្មី នៅពាក់កណ្តាលខែតុលាឆ្នាំនេះ។
មុនការយកបាន ព្រះអង្គម្ចាស់ខាងលើ ក៏ប្រកៀកប្រកិតនឹងការចរចារវាងភាគីចង់បានពីរផ្សេងទៀត ដូចសេដ្ឋីជនជាតិអាមេរិក Ratcliffe តែមិនទទួលបានជោគជ័យឡើយ។ គួរឲ្យដឹងថា នេះជាទំហំចំណេញដ៏លើសលប់ជិតគុណជា ១០ ឯណោះ ដ្បិតអីត្រកូល Glazer បានទិញយកបិសាចក្រហមកាលឆ្នាំ ២០០៥ នៅតម្លៃត្រឹមតែ ៨០០ លានផោនប៉ុណ្ណោះ។
ក៏ប៉ុន្តែពេលចុងក្រោយក្លឹបហាក់ធ្លាក់ចុះនៅវិបត្តិផ្នែកហិរញ្ញវត្ថុ ទំនងដោយសារការគ្រប់គ្រងមិនល្អ បូកផ្សំវិបត្តិសេដ្ឋកិច្ចពិភពលោកជួបប្រទះកន្លងមកផង នាំឲ្យក្លឹបជំពាក់បំណុលច្រើនជាង ១ ពាន់លានផោនឯណោះ។ យើងសង្ឃឹមថាម្ចាស់ថ្មី នឹងអាចចូលមកដោះស្រាយបញ្ហានានាទាំងអស់នោះបាន៕