ថ្ងៃទី ០៧ កញ្ញា ជាកាលបរិច្ឆេទបិទបញ្ចប់ទីផ្សារដោះដូររដូវក្តៅ នៅក្របខ័ណ្ឌបាល់ទាត់អារ៉ាប៊ីសាអូឌីត ជាលទ្ធផលមានការភ្ញាក់ផ្អើលពីល្ងាចថ្ងៃព្រហស្បតិ៍ជុំវិញដំណឹងផ្ទេរចេញ Jadon Sancho ពី Manchester United ទៅកាន់ក្លឹប Al-Ettifaq។ ទោះយ៉ាងណាលទ្ធផលបញ្ចប់ គឺមិនជោគជ័យ។
នេះតាមរបាយការណ៍ Fabrizio Romano ចុះផ្សាយ ដែលថាដំបូងឡើយខាងក្លឹបដឹកនាំដោយលោក Steven Gerrard ពិតជាចាប់អារម្មណ៍ស្ថានការណ៍បន្ទាន់ ក្រោយឃើញភាពមិនប្រក្រតីរវាងកីឡាករអង់គ្លេស និងគ្រូសញ្ជាតិហូឡង់ Erik ten Hag ទោះជាយ៉ាងណាការចរចារយៈពេលខ្លី វាមិនអាចសម្រេចទៅបាន។
ផ្ទុយទៅវិញ ក្លឹបនៅ Saudi Pro League បិទបញ្ចប់ការយកបានអ្នកចុងក្រោយគឺ Demarai Gray ពី Everton ក្នុងទំហំទឹកប្រាក់ ១០ លានផោន ក៏អាចជាមូលហេតុនាំឲ្យដំណើរផ្ទេរ Sancho ត្រូវលុបចោលវិញតែម្តងទៅ។ នេះតាមហាងឆេងខាងក្លឹបអាណាព្យាបាល United ចង់បាន ចូលល្បាក់ ៤០ ទៅ ៥០ លានផោន។
ថយក្រោយទៅឆ្នាំ ២០២១ ពួកគេទិញចូលក្នុងតម្លៃ ៧៣ លានផោន បន្តមកទល់ឥឡូវជាតួលេខខាតបង់ជិតពាក់កណ្តាល។ ពេលចុងក្រោយ Sancho មិនទទួលបានពេលវេលាបង្ហាញខ្លួនច្រើននោះទេ ហើយក៏មិនទាន់ជាប់ជម្រើសដំបូងសូម្បីមួយនោះដែរនៅ Premier League ដ្បិតចាប់ផ្តើម ៤ ជុំទៅហើយ៕