អតីតអ្នកចាត់ការក្រុមតោខៀវ Chelsea លោក Graham Potter ថ្មីៗនេះ ត្រូវបានគេចាត់ទុកថាជាបេក្ខភាពដ៏សំខាន់បំផុតមួយ ក្នុងការចូលទៅកាន់តំណែងនៅក្លិបបិសាចក្រហម Manchester United ប្រសិនបើលោក Erik ten Hag សម្រេចចាកចេញពីតំណែងនោះ។
ជាការពិតណាស់ លោក Potter បានអវត្តមានពីការងារ ចាប់តាំងពីត្រូវបានក្រុម Chelsea បណ្តេញចេញពីតំណែងកាលពីខែមេសាកន្លងទៅ បន្ទាប់ពីចំណាពេលត្រឹមប្រាំពីរខែនៅទឹកដី Stamford Bridge ។
ហើយកាលពីពេលថ្មីៗនេះ បើយោងតាមកាសែត The Sun រាយការណ៍ថា លោក Potter ត្រូវបានកោតសរសើរយ៉ាងខ្លាំងដោយលោក Sir Jim Ratcliffe ដែលកំពុងរៀបចំក្នុងការទិញយកភាគហ៊ុនមួយផ្នែកធំ ដើម្បីគ្រប់គ្រងក្លិប Man Utd ។
ប្រភពដដែលនេះ បានរាយការណ៍ទៀតថា លោក Ratcliffe គ្រោងនឹងទិញភាគហ៊ុន ២៥% ក្លិប Man Utd ក្នុងតម្លៃប្រហែល ១,៥ពាន់លានផោន ហើយប្រសិនបើដំណើរការនេះអាចបញ្ចប់ទៅបាន នោះលោក នឹងពិចារណាលើការផ្លាស់ប្តូរអ្នកចាត់ការថ្មី ដោយចាត់ទុក លោក Potter ជាគោលដៅធំរបស់ខ្លួន ៕