ក្លឹបអធិរាជស Real Madrid កំពុងពេញចិត្តនឹងការប្រើប្រាស់វត្តមានចំណូលថ្មី Kepa Arrizabalaga ដ្បិតបើត្រឹមលក្ខខណ្ឌខ្ចីជើង តែគុណភាពពិតជាមិនណយ ឥឡូវផ្តើមរំអុកចិត្តឲ្យក្លឹបមេ លក់ផ្តាច់កុងត្រាក្នុងលក្ខខណ្ឌដោះដូរស្មើតែម្តង ជាជាងការចំណាយលុយសុទ្ធ។
ជាការពិតកីឡាករអេស្ប៉ាញ ទំនងអាចប្រជែងតំណែងដៃទីមួយ រវាង Thibaut Courtois បាន ដ្បិតគេអាចរំពឹងត្រលប់មកវិញនាប៉ុន្មានខែបន្ទាប់ ត្រង់អ្នកចាំទីវ័យ ២៩ ឆ្នាំ បង្ហាញខ្លួន ១២ ប្រកួត ក៏ជាចំណែកធំ ជួយក្លឹបដឹកនាំដោយលោក Carlo Ancelotti ឡើងឈរកំពូលតារាង La Liga និងឈ្នះ ៣ ប្រកួតជាប់នៅ Champions League។
បើតាមសារព័ត៌មាន The Sun រាយការណ៍មក ខាងក្លឹប Chelsea ទាមទារតម្លៃផ្តាច់កុងត្រា ១៧,៥ លានផោន បើ Madrid ចង់យកនៅទីផ្សាររដូវក្តៅ តែយ៉ាងណាខាងភាគីក្លឹបម្ចាស់ដី Bernabeu បានដាក់សំណើមួយផ្សេងទៀត គឺចង់ប្រគល់ជូន Andriy Lunin ជាដៃទីពីររបស់ខ្លួន ក្នុងលក្ខខណ្ឌប្តូរស្មើតែម្តង។
រំឭកដែរថា កីឡាករវ័យ ២៤ ឆ្នាំ Lunin គេមកចូលរួមនៅក្លឹបតាំងឆ្នាំ ២០១៨ សរុបការបង្ហាញខ្លួន ១៩ ប្រកួត ហើយធ្លាប់បានខ្ចីជើងទៅកាន់ក្លឹប Leganes, Valladolid និង Oviedo ជាដើម។ យ៉ាងណពេលចុងក្រោយកីឡាករអ៊ុយក្រែនសឹងតែគ្មានឱកាស ជាពិសេសពេល Kepa មកក្លាយជាសំណព្វចិត្តគ្រូ Ancelotti ផង៕