ក្លិបបិសាចក្រហម Manchester United ត្រូវបានគេរាយការណ៍មកថា កំពុងត្រៀមខ្លួនរួចជាស្រេចហើយ ក្នុងការទាក់ទាញខ្សែប្រយុទ្ធឆ្នើម Antoine Griezmann របស់ក្លិប Atletico Madrid មកកាន់ទឹកដីអង់គ្លេស។
ជាក់ស្តែង ទោះបីជាមានការចុះហត្ថលេខានាំយក Rasmus Hojlund ក្នុងអំឡុងទីផ្សាររដូវក្តៅក៏ដោយ ប៉ុន្តែក្លិប Man United នឹងសម្លឹងរកការមើលការនាំយកជម្រើសខ្សែប្រយុទ្ធថ្មីមកបន្ថែមទៀត មិនថាក្នុងទីផ្សារខែមករា ឬរដូវក្តៅក្រោយនោះទេ។
ហើយថ្មីៗនេះ បើយោងតាមសារព័ត៌មាន El Nacional បានឲ្យដឹងថាក្លិប Man United ត្រៀមនឹងពិចារណាលើការផ្ទេរក្នុងចំនួនទឹកប្រាក់ដ៏ច្រើនសម្រាប់ Griezmann ឱ្យបានឆាប់តាមដែលអាចធ្វើទៅបាន។
ប្រភពដដែលនេះ បានអះអាងទៀតថាក្លិបបិសាចក្រហមនឹងរីករាយក្នុងការបង្កើនប្រាក់ឈ្នួលដល់ទៅបីដងរបស់កីឡាករសញ្ជាតិបារាំង ក្នុងចំនួនប្រមាណ ៣៥០ ០០០ ផោនក្នុងមួយសប្តាហ៍ បើសិនរូបគេយល់ព្រមផ្ទេរមកកាន់ទឹកដី Old Trafford នោះ៕