ប្រធានសហព័ន្ធកីឡាបាល់ទាត់លើតុ បើកចំហរ និងស្វាគមន៍ជានិច្ចចំពោះមហាជនគ្រប់រូបចង់ចូលរួមអភិវឌ្ឍន៍ ឬចង់ចូលលេងកីឡាមួយនេះដើម្បីពង្រីកសក្ដានុពលនៅកម្ពុជា។
ឯកឧត្ដម វ៉ាត់ ចំរើន ថ្លែងក្នុងពិធីបើកការប្រកួតកីឡាបាល់ទាត់លើតុជ្រើសរើសជើងឯកថ្នាក់ជាតិ ឆ្នាំ២០២៣ ល្ងាចមិញនេះថា កីឡាមួយនេះថ្មី និងទើបតែមានសកម្មភាពលើពិភពលោកហើយកើតចេញមកដោយមានការទទួលស្គាល់ពីក្រុមប្រឹក្សាកីឡាអូឡាំពិកអាស៊ី។
ប្រធានសហព័ន្ធខាងលើបន្ថែមទៀតថា បាល់ទាត់លើតុនេះគឺមានការប្រកួតកម្រិតតំបន់ និងកម្រិតទ្វីបហើយក៏មានជាការប្រកួតជើងឯកពិភពលោកជារៀងរាល់ឆ្នាំផងដែរ។ កីឡាមួយនេះគឺមានការគាំទ្រ និងពេញនិយមច្រើនពីបណ្ដាតារាបាល់ទាត់ពិភពលោក និងបានចូលរួមផ្សព្វផ្សាយជាខ្លាំងលើប្រព័ន្ធផ្សព្វផ្សាយកន្លងទៅ។
សហព័ន្ធសម្រេចធ្វើការប្រកួតជ្រើសរើសជើងឯកថ្នាក់ជាតិនេះគឺដើម្បីបន្តនិរន្តរភាពការងារបច្ចេកទេសរបស់សហព័ន្ធ។ ឯកឧត្ដមសូមអំពាវនាវដល់ឯកឧត្ដម លោកជំទាវ លោក លោកស្រី ដែលស្ម័គ្រចិត្តចង់ចូលរួមបម្រើការងារក្នុងសហព័ន្ធ ប្រើការងារក្នុងក្លឹបនានាសូមស្វាគមន៍ និងបើកចំហជានិច្ច។ជាមួយគ្នានេះដែរសូមក្លឹបនិមួយៗធ្វើការពង្រីកសមាជិក ពង្រីកសកម្មភាពហ្វឹកហាត់ ប្រកួតឲ្យកាន់តែផុលផុសបានច្រើន ព្រោះប្រភេទកីឡានេះងាយហ្វឹកហាត់ ងាយលេង និងមិនតម្រូវទីតាំងធំ ឬស្មុគស្មាញនោះឡើយ។
បញ្ជាក់ដែរថា សហព័ន្ធកីឡាបាល់ទាត់លើតុកម្ពុជា បានបើកការប្រកួតជ្រើសរើសជើងឯកថ្នាក់ជាតិ ឆ្នាំ២០២៣ របស់ខ្លួនហើយកាលពីថ្ងៃទី២៥ និងបិទបញ្ចប់នៅថ្ងៃទី២៦ ខែធ្នូ ឆ្នាំ២០២៣ ស្អែកនេះ។ ការប្រកួតនេះធ្វើឡើងក្នុងសាលមជ្ឈមណ្ឌលហ្វឹកហ្វឺនកីឡានៃពហុកីឡដ្ឋានជាតិ៕