ក្លិប Manchester City ត្រូវបានគេរាយការណ៍មកថាកំពុងរៀបចំផ្តល់ជូនកុងត្រាថ្មីបន្ថែមទៀតដល់ខ្សែបម្រើឆ្នើមរបស់ខ្លួន គឺកីឡាករ Kevin de Bruyne ដោយរំពឹងថានឹងអាចរក្សារូបគេឲ្យនៅក្លិបរហូតឆ្នាំ ២០២៦ ។
ជាក់ស្តែងកីឡាករសញ្ជាតិប៊ែលហ្ស៊ិកបានមកដល់ទឹកដី Etihad ពីក្រុម Wolfsburg ក្នុងឆ្នាំ ២០១៥ ជាមួយនឹងតម្លៃផ្ទេរប្រមាណ ៥៥លានផោន។
គួរឲ្យដឹងថាកុងត្រាបច្ចុប្បន្នរបស់កីឡាករវ័យ ៣២ឆ្នាំរូបនេះ នៅសេសសល់រយ:ពេល ១៨ខែទៀត ដោយគេអាចកើបប្រាក់ឈ្នួលបានប្រមាណ ៣៧០ ០០០ ផោនក្នុងមួយសប្តាហ៍។
ហើយឥឡូវនេះ បើតាមការចុះផ្សាយពីសារព័ត៌មាន Mirror បានរាយការណ៍មកថា ក្លិប Man City នៅតែមានបំណងក្នុងការផ្តល់ជូនកុងត្រាថ្មីបន្ថែមទៀត សម្រាប់ De Bruyne ដោយសារតែបានមើលឃើញពីភាពស្មោះត្រង់ និងការបង្ហាញគុណផលលេងដ៏ល្អ។
ប្រភពដដែលនេះ ក៏បានរាយការណ៍ទៀតថា De Bruyne មានឱកាសទទួលបានប្រាក់ឈ្នួលដល់ទៅ ១លានផោនក្នុងមួយសប្តាហ៍ ប្រសិនបើគេព្រមដើរចូលក្រុមនៅក្នុងលីគអារ៉ាប់។ ប៉ុន្តែទោះជាយ៉ាងណាក៏ដោយកីឡាកររូបនេះ គ្មានបំណងដើរចេញពីក្លិបអង់គ្លេសនោះឡើយ ដោយចាត់ទុក Man City ជាផ្ទះរបស់ខ្លួន៕