អនុប្រធានសហព័ន្ធកីឡាចំបាប់កម្ពុជា លោក ខេស៊ី បាណេត ថាការប្រកួតជើងឯកថ្នាក់ជាតិ ឆ្នាំ២០២៣ ដែលទើបបញ្ចប់ម្សិលមិញនេះមានការចូលរួមប្រកួតច្រើនពីសំណាក់យុវជន ពិសេសនោះគឺមកពីបណ្ដាខេត្តទៀតផង។
លោក ខេស៊ី បាណេត បានឲ្យដឹងថា សម្រាប់ការប្រកួតជើងឯកថ្នាក់ជាតិ ឆ្នាំ២០២៣ ដែលធ្វើឡើងចាប់ពីថ្ងៃទី១៨ ដល់ ២១ ខែមករា ក្នុងពហុកីឡដ្ឋានជាតិនេះមានការខុសប្លែកពីឆ្នាំមុនៗនោះគឺឆ្នាំនេះទទួលបានការចូលរួមច្រើនពីយុវជន។ ក្នុងនោះយុវជនដែលមកចូលរួមគឺមានមកពីខេត្តពោធិ៍សាត់ កំពង់ឆ្នាំង ខេត្តកណ្ដាល វិហារសួគ៌ជាដើម។
អនុប្រធានសហព័ន្ធខាងលើនេះលើកឡើងទៀតថា អ្វីដែលគួរឲ្យចាប់អារម្មណ៍មួយទៀតនោះគឺការរីកចម្រើន និងកើនឡើងផ្នែកបច្ចេកទេសជាងឆ្នាំមុនៗ។ ទាំងនេះបង្ហាញពីការខំប្រឹងប្រែងរបស់គ្រូៗតាមបណ្ដាក្លឹបមានការផែនការហ្វឹកហាត់បានល្អ យកចិត្តទុកដាក់ក្នុងការពង្រីកផ្សព្វផ្សាយដល់យុវជនដែលមានចិត្តស្រឡាញ់ និងចង់ហ្វឹកហាត់កីឡាមួយនេះ។ សហព័ន្ធនឹងផ្ដល់អាទិភាពដល់កីឡាករ កីឡាការិនី យុវជនណាដែលមានសមត្ថភាពនឹងមានឱកាសសម្រាប់ហ្វឹកហាត់ត្រៀមការប្រកួតយុវជនអាស៊ី ឆ្នាំ២០២៩ នាពេលខាងមុខ។
បញ្ជាក់ដែរថា សហព័ន្ធកីឡាចំបាប់កម្ពុជា បានបិទបញ្ចប់ការប្រកួតជើងឯកថ្នាក់ជាតិ ឆ្នាំ២០២៣ របស់ខ្លួនហើយកាលពីល្ងាចថ្ងៃទី២១ ខែមករា ឆ្នាំ២០២៤ នៅក្នុងពហុកីឡដ្ឋានជាតិ។ ចំណាត់ថ្នាក់លេខ១ បានលើក្រសួងមហាផ្ទៃ ឈ្នះមេដាយមាស៨ ប្រាក់៩ សំរឹទ្ធ១៣ សរុប ៣០គ្រឿង លេខ២ បានលើក្លឹបគិរីបារមីដំរីមានរិទ្ធ ឈ្នះមេដាយមាស១ ប្រាក់១ សំរឹទ្ធ១ សរុប ៣គ្រឿង លេខ៣ បានលើក្លឹបយាយព្រីងមានរិទ្ធ ឈ្នះមេដាយមាស១ ប្រាក់១ សរុប ២គ្រឿង៕