ខ្សែការពារស្ថិតក្រោមក្លឹបមេ Liverpool គឺ Sepp van den Berg ដែលបានទៅខ្ចីជើងឲ្យក្លឹបបច្ចុប្បន្ន Mainz 05 នៅឯប្រទេសអាល្លឺម៉ង់ ហាក់បានឲ្យតម្រុយជាមុន នឹងមិនត្រលប់មកបន្តជាមួយ Anfield ទេ ក្រោយផុតកុងត្រាខ្ចីជើង ពោលមកវិញ គឺមកស៊ីញ៉េកិច្ចព្រមព្រៀងចែកផ្លូវនោះឯង។
នេះក្លឹបដឹកនាំដោយអ្នកចាត់ការលោក Jurgen Klopp បានចុះហត្ថលេខាទិញយកខ្សែការពារកណ្តាល សញ្ជាតិហូឡង់ ចេញពីក្លឹប FC Schalke 04 កាលរដូវក្តៅ ឆ្នាំ ២០២៣ ហើយយកមកគឺមិនប្រើប្រាស់តែម្តង ទើបដាក់ឲ្យខ្ចីជើង ដល់តែកីឡាករក៏មើលដឹងសញ្ញាមិនល្អមុន ថាពិបាកប្រជែងនឹងរៀមច្បងទើបគិតដល់គំនិតចែកផ្លូវ។
កីឡាករកម្ពស់បាន ១,៩២ ម៉ែត្រ និយាយ៖ “បើខ្ញុំត្រលប់ទៅ Liverpool វិញ ពួកគេប្រហែលចង់ឲ្យខ្ញុំបន្តនៅ តែខ្ញុំមើលឃើញថាប្រសិនណាមិនទទួលបានពេលវេលានៃការប្រកួតច្រើន ម្ល៉េះខ្ញុំប្រហែលនឹងចាកចេញដូចគ្នា វាពិតជាសំខាន់ណាស់សម្រាប់ខ្ញុំ ក្នុងការទទួលបានឱកាសចូលលេង”។
លោកបន្ត៖ “នៅប៉ុន្មានឆ្នាំមុន ខ្ញុំមិនទទួលអារម្មណ៍ថាអាចជាប់ជម្រើសដំបូងពីលើ Virgil [van Dijk] ទេ តែពេលឥឡូវនេះខ្ញុំគិតថាខ្លួនឯងកំពុងធ្វើបានល្អ ខ្ញុំអាចគ្រប់គ្រងស្ថានភាពនៅ Liverpool និងអាចប្រជែងបាន យ៉ាងណាក៏នៅតែដឹងច្បាស់ថា Virgil និង Konate មិនជាការដែលប្រជែងងាយៗឡើយ ខ្ញុំដឹងថាវាមានការពិបាក”៕