មានដំណឹងភ្ញាក់ផ្អើលនៅព្រឹកនេះ ចុះផ្សាយពាក់ព័ន្ធនឹងការសម្រេចចិត្តរបស់ Brahim Diaz ប្តូរពីការតំណាងឈ្មោះឲ្យជម្រើសជាតិអេស្ប៉ាញ មកជាជម្រើសជាតិម៉ារ៉ុកវិញ។ អ្នកចាត់ការជម្រើសជាតិក៏មិនទាន់ឆ្លើយតបបែបម៉េចដែរ តែល្ហៀងៗប្រកួតខាងមុខ ហាក់នៅតែចង់កោះហៅកីឡាករ Real Madrid ដូចដើម។
បើតាមសារព័ត៌មាន Marca ឯណោះ ចុះផ្សាយ Playmaker ដ៏ប៉ិនប្រសព្វរបស់ស្តេចសមិនបានរង់ចាំ ការកោះហៅរបស់គ្រូធំអេស្ប៉ាញ Luis de la Fuente នោះទេ ផ្ទុយទៅវិញចង់បានសំណើពីគ្រូម៉ារ៉ុកលោក Walid Regragui ជាងសម្រាប់ប្រកួតមិត្តភាពនាពាក់កណ្តាលខែមិនាខាងមុខតែម្តង។
ងាកទៅការយល់ឃើញរបស់ la Fuente ឆ្លើយតបនៅរសៀលថ្ងៃចន្ទ៖ “ខ្ញុំអត់ទាន់បាននិយាយបែបណាទេទៅកាន់ Brahim ថានឹងកោះហៅគេឬក៏អត់ យ៉ាងណាខ្ញុំជូនពរឲ្យគេទទួលរឿងល្អបំផុតក្នុងជីវិត គ្រប់គ្នាគឺមានសេរីភាពក្នុងការសម្រេចចិត្តដោយឯកឯង”។
លោកបន្ត៖ “មាន ៣ ជម្រើសក្នុងការកោះហៅ ត្រង់ទីមួយគេមានសិទ្ធ ទីពីរគេចង់លេងនៅទីនេះ ហើយទីបីគឺខ្ញុំនឹងជ្រើសយកគេ សំខាន់បំផុតគឺភាពដែលចង់ ដោយមិនទាមទារអ្វីឬលក្ខខណ្ឌអ្វីទាំងអស់ ដូច្នេះខ្ញុំគោរពតាមការសម្រេចចិត្តរបស់គេមួយទំហឹងតែម្តង”៕