អ្នកចាំទីអ៊ុយក្រែនដែលមួយរយៈក្រោយហាក់ទទួលបានឱកាស ក្លាយជាតួឯកច្រើនជាងមុននៅ Real Madrid បាននឹងកំពុងស្ថិតក្នុងដំណាក់កាលពិចារណា ពាក់ព័ន្ធអនាគតរបស់ខ្លួនមុនឈានមកដល់បញ្ចប់រដូវកាលខាងមុខ ដែលកៀកនឹងផុតសុពលភាពកុងត្រាសេសសល់។
ពេលវេលាបញ្ចប់ត្រូវមកដល់នៅចុងខែមិថុនា ឆ្នាំក្រោយ តែដំណឹងពីដំបូងAndriy Lunin អាចចាកចេញ ដល់ក្រោយមកពេល Carlo Ancelotti ជាគ្រូ បត់ទម្រង់ថ្មី បកមកប្រើប្រាស់គេវិញ ក៏ហាក់ធ្វើឲ្យមានការផ្លាស់ប្តូរចិត្ត និងចង់គិតគូរសុំក្លឹបបន្តកុងត្រាថ្មីបន្ថែមទៀតតែម្តង។
បច្ចុប្បន្នអាចរាប់គេជាជម្រើសពីលើឈ្មោះ Kepa Arrizabalaga តែមិនទាន់ប្រាកដប្រជានឹងអាចរក្សាបន្តទៅមុខបែបណាទៀតនោះទេ ត្រង់ដំណឹងល្ហៀងៗ Thibaut Courtois ជាអតីតដៃពីងពាងរបស់ Madrid សម្រាកច្រើនខែ ក៏ប្រុងនឹងត្រលប់មកវិញនាពេលវេលាដ៏ខ្លីខាងមុខ។
អំពីស្ថិតិជារួមរដូវកាល ២០២៣/២៤ អ្នកចាំទីកម្ពស់បាន ១,៩១ ម៉ែត្រ បង្ហាញខ្លួនសរុប ២៣ ប្រកួត ក៏របូត ១៩ គ្រាប់ និង Clean Sheets ដល់ទៅ ១០ ជាមួយចំនួននាទីឈរជើងសរុប ២ ១០០ នាទី។ យ៉ាងណាវគ្គសំខាន់ ៨ ក្រុម UCL ខាងមុខ ហាក់មិនទាន់ធានា ១០០ ភាគរយទេ ថាគេនឹងបន្តបានឱកាសឬអត់នោះ ព្រោះ Courtois ត្រូវបានគ្រូធំ ហៅឈ្មោះត្រលប់មកវិញជាបណ្តើរៗ៕