ក្នុងជំនួបដណ្តើមពាន Super Cup រវាងជើងឯក UEFA Champions League និងជើងឯក UEFA Europa League ដែលធ្វើឡើងនៅកីឡដ្ឋាន Warszawa ប្រទេសប៉ូឡូញ នៅរាត្រីថ្ងៃទី១៤ ខែសីហា ខ្សែបម្រើ Federico Valverde សម្រេចទីគ្រាប់នាំមុខឱ្យក្រុមយក្សអេស្ប៉ាញនៅនាទី៥៩ តាមរយៈការបញ្ជូនដ៏ល្អរបស់ Vinicius Junior។ ៩នាទីបន្ទាប់ ខ្សែប្រយុទ្ធឆ្នើមរបស់បារាំង និងជាសមាជិកថ្មី Mbappe បន្ថែមគ្រាប់ទី២ ពីការបញ្ជូនរបស់ Jude Bellingham ជួយ Real Madrid ឈ្នះក្រុមអ៊ីតាលី Atalanta ២-០។
ជាការបង្ហាញខ្លួនដំបូងរបស់ Mbappe និងថែមទាំងអាចរកបានគ្រាប់បាល់បញ្ចូលទីថែមទៀត នេះទំនងបញ្ជាក់ថាជាការចាប់ផ្តើមដ៏ល្អជាមួយក្រុមថ្មីក្រោយចាកចេញពី Paris St Germain ខណៈខ្សែប្រយុទ្ធអន្តរជាតិបារាំងបានជួយ Real Madrid លើកពាន Super Cup ដែលជាការឈ្នះលើកទី៦ដងច្រើនបំផុតជាកំណត់ត្រា។
«នេះជាការប្រកួតដ៏អស្ចារ្យ ដែលខ្ញុំបានទន្ទឹងរង់ចាំអស់រយៈពេលយូរមកហើយ។ បានពាក់អាវ Real Madrid ប្រកួតជាមួយអ្នកគាំទ្ររបស់អធិរាជស ជាក្តីសុបិន និងជាដាដូពិសេសសម្រាប់ខ្ញុំ»។ នេះជាការលើកឡើងរបស់ Mbappe ស្របពេលរូបនេះរីករាយពេលបានបង្ហាញខ្លួនជាមួយមិត្តរួមក្រុមដែលមានទេពកោសល្យដូចជា Vinicius Jr, Jude Bellingham និង Rodryg ក្រោមការដឹកនាំរបស់អ្នកចាត់ការ Carlo Ancelotti៕