ក្រុមកីឡាបាល់ទាត់ម៉ុងហ្គោលី នឹងទទួលកម្ពុជា ក្នុងការប្រកួតមិត្តភាពអន្តរជាតិជើងទី២ នៅរដ្ឋធានីអ៊ូឡង់បាទ័រ នៅថ្ងៃទី១១ ខែមិថុនា វេលាម៉ោង ៤ រសៀល [ម៉ោងនៅកម្ពុជា]។ នៅជំនួបជើងទី១ នៅពហុកីឡដ្ឋានជាតិអូឡាំពិក គោព្រៃទទួលបានជ័យជម្នះក្នុងលទ្ធផល ២-០។
ក្នុងសន្និសីតព័ត៌មាននៅថ្ងៃទី១០ ខែមិថុនា គ្រូបង្វឹកកម្ពុជាលោក Dalmas បានលើកសរសើរចំពោះការទទួលភ្ញៀវយ៉ាងល្អរបស់ម្ចាស់ផ្ទះម៉ុងហ្គោលី ក្រោយក្រុមកម្ពុជាចាកចេញពីកម្ពុជាភ្លាមៗ បន្ទាប់ពីប្រកួតចប់នៅភ្នំពេញ។ សម្រាប់ជំនួបទី២ គ្រូសញ្ជាតិអាហ្សង់ទីន បានរៀបចំក្រុមឡើងវិញ ដ្បិតការប្រកួតត្រូវធ្វើឡើងនៅទីក្រុង អ៊ូឡង់បាទ័រ ដែលមានអាសធាតុត្រជាក់ ប្រមាណជាង១០អង្សារ។
«បន្ទាប់ពីការប្រកួតនៅទឹកដីកម្ពុជាយើងបានធ្វើដំណើរមកទីនេះភ្លាមៗ ហើយយើងមានពេលសម្រាកតិច ប៉ុន្តែយើងបានរៀបក្រុមឡើងវិញដើម្បីតទល់ជាមួយម៉ុងហ្គោលី»។ នេះជាការលើកឡើងរបស់លោក Dalmas ទៅកាន់អ្នកសារព័ត៌មាន។
រៀបចំក្រុមឡើងវិញ ដោយសារលោក Dalmas យល់ឃើញថា កាលជំនួបនៅថ្ងៃទី៧ ខែមិថុនា ទាំងកម្ពុជា និងម៉ុងហ្គោលី សុទ្ធតែមានការលំបាក ដោយសារមានភ្លៀងធ្លាក់ខ្លាំងលើទីលាន។ ដោយឡែក នៅជំនួបទី២នេះ ក្រុមគោព្រៃត្រូវព្យាយាមសម្របជាមួយអាកាសធាតុត្រជាក់វិញ។
«យើងនឹងបន្តរៀបចំក្រុមឱ្យបានល្អជាងមុន ព្រោះម៉ុងហ្គោលីជាក្រុមមួយដ៏ល្អ ហើយយើងជឿជាក់ថាការប្រកួតនេះ ជាការប្រកួតមួយដ៏តានតឹង»។ លោក Dalmas បន្ថែម។
ជ័យជម្នះនៅជំនួបមិត្តភាពអន្តរជាតិជើងទី១ របស់កម្ពុជា លើម៉ុងហ្គោលីក្នុងលទ្ធផល ២-០ ធ្ចើបានដោយ Yudai Ogawa និង សារ ទី។ តើកម្ពុជា អាចរក្សាភាពមិនចាញ់ក្រុមម៉ុងហ្គោលីបានដែលឬទេសម្រាប់ជំនួបលើកទី៣នេះ? កាលពីប៉ះគ្នាដំបូងនៅឆ្នាំ ២០១៩ ក្រុមទាំងពីរស្មើគ្នា ១-១ នៅពហុកីឡដ្ឋានជាតិអូឡាំពិក៕