នៅបទសម្ភាសន៍ជាមួយសារព័ត៌មានអេស្ប៉ាញ AS ថ្មីៗនេះ ខ្សែប្រយុទ្ធដែល Real Madrid ទើបយកបានកាលរដូវក្តៅ គឺ Joselu បានលើកឡើងសរសើរដល់មិត្តរួមក្រុម Toni Kroos មិនដាច់ពីមាត់ ហើយថាកម្រិតកីឡាករអាល្លឺម៉ង់ សមតែបានពានឯកត្តជន Ballon d’Or កាន់ធូរៗ។
ចំណូលថ្មីខ្ចីជើងចេញពីក្លឹប Espanyol បាននិយាយអំពីខ្សែបម្រើវ័យ ៣៣ ឆ្នាំ ដែលជាមិត្តរួមទីលានរបស់ខ្លួន យ៉ាងដូច្នោះថា៖ “Toni Kroos គេគួរតែបានឈ្នះពាន Ballon d’Or ៥ គ្រឿង នេះគេជាកីឡាករដ៏អស្ចារ្យម្នាក់ គេមានឥទ្ធិពលក្នុងការផ្លាស់ប្តូរការប្រកួតទាំងមូលបាន”។
លោកបន្ត៖ “គេជាកីឡាករមួយរូបដែលនាំឲ្យខ្ញុំចាប់អារម្មណ៍ខ្លាំងបំផុតនៅ Real Madrid គេអត់ដែលលេងឲ្យខូចបាល់ទេ ហើយលេងទាំងរបៀបត្រជាក់បំផុត ដែលអាចផ្លាស់ប្តូរអ្វីម្យ៉ាងបាន ខ្ញុំពិតជារីករាយនឹងបានរួមជើងនៅទីនេះជាមួយ Kroos”។
បញ្ជាក់ថា ជាការពិតសម្រាប់ខ្សែបម្រើកាន់ឆ្នាំខាងលើ បើទោះបីពេលចុងក្រោយស្តេចសប្រមូលយកបានយុវជនថ្មីជាហូរហែ មានតាំងពី Aurelien Tchouameni, Jude Bellingham ណិង Eduardo Camavinga ជាដើម ក៏គេនៅតែមានលទ្ធភាពជាប់ជម្រើសដំបូងក្រោមការដឹកនាំរបស់លោក Carlo Ancelotti ជាមួយនឹងមិត្តកាន់ឆ្នាំ Luka Modric ដដែល៕