ក្លឹបអ្នកមានបុណ្យ Barcelona ត្រូវបានរាយការណ៍ មិនបង្អែបង្អង់យូរនោះទេ ក្នុងការសម្រេចចិត្ត នេះបានចាត់ចែងការបន្តកុងត្រាថ្មី ដល់កីឡាករវ័យក្មេង Lamine Yamal បន្ទាប់តែមើលឃើញទម្រង់លេងដ៏ល្អត្រឹមរយៈពេលខ្លីកន្លងមក។
យុវជនស្ថិតក្រោមការដឹកនាំដោយអ្នកចាត់ការលោក Xavi Hernandez បានចាប់ផ្តើមការលេងដ៏ល្អ ជាមួយកំណត់ត្រាហូហែរ ហើយកន្លងមកនោះក៏ជាប់ទាំងនៅជម្រើសជាតិ នាមកីឡាករអេស្ប៉ាញវ័យក្មេងបង្អស់ រកបានគ្រាប់បាល់នៅ UEFA Euro 2024 វគ្គជម្រុះបឋម នៅអាយុត្រឹម ១៦ ឆ្នាំ និង ៥៧ ថ្ងៃ។
ឥឡូវ Yamal ក៏ល្ហៀងៗទទួលបានការវិវត្តនៃកុងត្រាថ្មី នេះមានន័យឡើងទាំងពេលវេលា ឡើងទាំងប្រាក់ឈ្នួលពីលើកុងត្រាចាស់ត្រូវផុតនៅចុងខែមិថុនា ឆ្នាំក្រោយ បន្តដល់ចុងខែមិថុនា ឆ្នាំ ២០២៦។ ក៏ប៉ុន្តែមិនទាន់មានការបញ្ជាក់ច្បាស់អំពីតម្លៃផ្តាច់កុងត្រាថ្មីបែបណានៅឡើយ ដ្បិតតាមដឹងកន្លងមក ក្លឹបដឹកនាំដោយប្រធានលោក Joan Laporta ឲ្យតែមានយុវជនល្អក្នុងដៃរមែងដាក់ខ្ពស់កប់ពពក។
តាមពិតទៅក្លឹបចង់បានកុងត្រាយូរជាងនោះផង គ្រាន់តាមច្បាប់របស់ UEFA អនុញ្ញាតឲ្យកំណត់ខ្ពស់បំផុតត្រឹមកុងត្រា ២ ឆ្នាំប៉ុណ្ណោះ ប្រើប្រាស់លើកីឡាករអាយុក្រោម ១៨ ឆ្នាំដូចជា Yamal។ គួរឲ្យដឹងដែរថា ស្ថិតិបង្ហាញខ្លួន ៨ ប្រកួតសរុប គេ Assist បាន ២ លើកដល់ក្លឹប ដ្បិតមិនទាន់រកបានគ្រាប់បាល់នៅឡើយទាំង La Liga ទាំង UCL៕