មានការលើកឡើងតៗគ្នា តាំងពីប្រភពសារព័ត៌មានធំៗ ក៏សង្កត់ធ្ងន់ពាក់ព័ន្ធនឹងអនាគតនៃការឈ្នះពានឯកត្តជន Ballon d’Or របស់ Lionel Messi ដ្បិតការប្រកាសត្រូវចូលមកដល់នៅចុងខែខាងមុខ។ នេះវាត្រូវរាប់ចូលជាពានលើកទី ៨ ក្នុងអាជីពបុរសវ័យ ៣៦ ឆ្នាំ បន្ទាប់ការសម្រេចសមិទ្ធផលធំ FIFA World Cup កាលពីចុងឆ្នាំទៅ។
ទោះរាប់ថាវាជារឿងសាមញ្ញទៅហើយសម្រាប់កីឡាករអាហ្សង់ទីន តែនៅសល់ពានឯកត្តជនធំមួយផ្សេងទៀត ដែល Messi មិនទាន់ធ្លាប់បានឈ្នះនោះគឺ Golden Foot។ ពាននេះមានអាយុកាលជាង ២០ ឆ្នាំមកហើយ ដោយកន្លងមកបានផ្តល់ជូនវីរបុរសបាល់ទាត់នានាជាច្រើន រំលងតែឈ្មោះ Messi មួយគត់។
ដើម្បីបានឈ្នះពានរង្វាន់នេះ បេក្ខភាពកីឡាករទាំងអស់ត្រូវមានឈ្មោះចាប់ពីអាយុ ២៨ ឆ្នាំឡើងទៅ ហើយផ្តល់ជូនតែមួយលើកគត់ក្នុងអាជីពកីឡាករម្នាក់។ វាផ្តល់ជូនកីឡាករល្អបំផុត បោះឆ្នោតចេញពីស្ថាប័នកាសែត និងអ្នកដែលបានឈ្នះមុនៗ តួយ៉ាងដូច Cristiano Ronaldo, Mohamed Salah, Luka Modric និង Ronaldinho ជាដើម។
សម្រាប់ឆ្នាំ ២០២៣ អាចជាប្រកាសម្ចាស់ពាននេះ នៅចុងឆ្នាំ ឬល្បាក់ខែធ្នូ ជាក់ស្តែងដូចឆ្នាំទៅបានទៅលើ Robert Lewandowski។ យើងនឹងរង់ចាំមើល ខណៈបេក្ខភាពអាចសង្ឃឹមសារនេះ ក៏មានឈ្មោះ Messi នៅភាគរយខ្ពស់គួរសមដែរ៕