សិក្សាពីស្ថានភាពមួយរយៈពេលខ្លី ក្លឹបអេស្ប៉ាញ Getafe ហាក់អាចទាញចម្លើយប្រាប់ខ្លួនឯងច្បាស់ហើយ អំពីការសម្រេចចិត្តលើអនាគតយុវជនឆ្នើម Mason Greenwood នោះគឺ “Yes” នឹងបើកការចរចាថ្ពក់គេចេញពេញថ្លៃពីក្លឹបអាណាព្យាបាល Manchester United បន្ទាប់ផុតកុងត្រាខ្ចីជើងនាបញ្ចប់រដូវកាលខាងមុខ។
ស្ថិតក្នុងលក្ខខណ្ឌខ្ចីជើង ដែល Getafe នាំយកពីក្លឹបម្ចាស់ដី Old Trafford តាំងរដូវក្តៅ គេហាក់សាងភាពល្អប្រសើរត្រលប់មកវិញ តាមរយៈទម្រង់លេងដ៏ល្អលើទីលានឲ្យក្លឹបនៅ La Liga។ នេះយុវជនវ័យ ២២ ឆ្នាំ រកបាន ៣ គ្រាប់ និង ៣ Assists នៅ ១០ ប្រកួតសរុបជូនក្លឹប។
បើតាមសារព័ត៌មាន The Sun ចុះផ្សាយ ក្លឹបនៅ La Liga កំពុងបន្ថែមល្បឿនចរចារវាងភាគីក្លឹប Manchester United ពោលនឹងបញ្ជូនសំណើផ្លូវការទៅកាន់ក្លឹបអង់គ្លេសនាពេលដ៏ខ្លីខាងមុខ ដើម្បីទទួលបានចម្លើយឲ្យឆាប់រហ័សមកវិញដូចគ្នា។ តែយ៉ាងណាតាមចចាមអារ៉ាម ខាងក្លឹបមេ ហាក់មិនចង់លក់ផ្តាច់កុងត្រាទេ ផ្ទុយទៅវិញ អាចបើកភ្លើងខៀវត្រឹមការខ្ចីជើងបន្ថែមឆ្នាំតែប៉ុណ្ណោះឯង។
គួរឲ្យដឹងថា Greenwood គេសេសសល់កុងត្រានៅក្លឹប Man United ដល់ចុងខែមិថុនា ឆ្នាំ ២០២៥ ម្ល៉េះបើក្លឹបចរចាតកុងត្រាថ្មីបាន នោះនឹងឡើងតម្លៃខ្លួនទៀត តែបើអត់ទេ ក៏មានតែបណ្តោយឲ្យ Getafe អូសបន្លាយយក ដល់អស់កុងត្រា ក្លាយជា Free Agent តែម្តងនោះឯង៕