ក្លិប Granada និង Bayern Munich បានឈានដល់ការព្រមព្រៀងក្នុងការផ្ទេរខ្សែប្រយុទ្ធ Bryan Zaragoza។ នេះបើតាមការប្រកាសឱ្យដឹងពីសំណាក់ក្លិបទាំង២។
កីឡាករ អេស្ប៉ាញ វ័យ២២ឆ្នាំ នឹងផ្លាស់ទៅក្លិបនៃក្របខណ្ឌ Bundesliga នៅក្នុងរដូវក្ដៅឆ្នាំក្រោយ ដោយរូបគេនឹងចុះហត្ថលេខា លើកិច្ចសន្យារយៈពេល៥ឆ្នាំពោលគឺរហូតដល់ឆ្នាំ២០២៩ តែរូបគេនឹងបន្ដលេងនៅអេស្ប៉ាញក្រោមលក្ខខណ្ឌខ្ចីជើង រហូតដល់ដំណាច់រដូវកាលនេះ។
Bryan Zaragoza បានបង្ហាញសមត្ថភាពយ៉ាងលេចធ្លោសម្រាប់ Granada នារដូវកាលនេះ ជាពិសេសកាលពីប៉ុន្មានសប្ដាហ៍មុន ដែលរូបគេរកគ្រាប់បាល់ពីរគ្រាប់ទល់នឹង Barcelona និងការលេងដ៏ល្អមួយចំនួនផ្សេងទៀត។ ក្រោយមកគេទទួលបានឱកាសបង្ហាញខ្លួនជាលើកដំបូងសម្រាប់ក្រុមជម្រើសជាតិអេស្ប៉ាញថែមទៀតផង។
Bayern Munich ត្រូវបានរាយការណ៍ថា បានចំណាយទឹកប្រាក់១៥លានអឺរ៉ូក្នុងការផ្ទេរ Zaragoza ហើយក្លិបបានព្រមព្រៀងកិច្ចសន្យាជាមួយគេរហូតដល់រដូវក្ដៅឆ្នាំ២០១៩។
Bryan Zaragoza បានស៊ុតបញ្ចូលទី១០គ្រាប់ និង ចែកបាល់សម្រេចទី៣ដង ក្នុងការបង្ហាញខ្លួន៥១ដង សម្រាប់ Granada។ រូបគេបានបង្ហាញខ្លួនឱ្យក្រុមបាល់ទាត់ជម្រើសជាតិអេស្ប៉ាញ យកឈ្នះ ២-០ លើក្រុមជម្រើសជាតិស្កុតឡែន ក្នុងវគ្គជម្រុះ UEFA Euro 2024 កាលពីខែតុលាផងដែរ៕