ក្លឹបតោខៀវ Chelsea បានត្រៀមលក្ខណៈរួចរាល់ក្នុងការវ៉ៃចេញកីឡាករមួយចំនួន នៅទីផ្សារដោះដូរខែមករាប្រុងនឹងបើកទ្វារដើមឆ្នាំខាងមុខ ក៏មានទាំង Noni Madueke សមាជិកក្លឹបទើបយកមកចូលរួមនៅ Stamford Bridge ទើបបានរយៈពេលតែមួយឆ្នាំប៉ុណ្ណោះ។
គួរឲ្យដឹងតោខៀវបានចាយលុយក្រាស់ក្រែល ៤៥០ លានផោនកាលរដូវក្តៅ នាំយកកីឡាករដល់ទៅ ១៣ រូប តែលទ្ធផលសម្រេចបានរដូវកាលថ្មីនេះ មិនសមប្រកបដូចចិត្តចង់បានទេ។ ជាលទ្ធផលក្លឹបធ្លាក់មកឈរលេខ ១២ ចាញ់ដាច់ដល់ ១៨ ពិន្ទុធៀបនឹងក្លឹបកំពូលតារាង Liverpool គិតត្រឹមជុំទី ១៦។
បើតាមរបាយការណ៍ ESPN ចុះផ្សាយ ក្លឹបដឹកនាំដោយអ្នកចាត់ការលោក Mauricio Pochettino កំពុងរៀបចំការផ្ទេរចេញ Trevoh Chalobah ដោយខាងក្លឹប Bayern Munich និង AS Roma ធ្លាប់បានផ្សារភ្ជាប់មកកាន់កីឡាករវ័យ ២៤ ឆ្នាំ រួមទាំងក្លឹបនៅ Premier League ផ្ទាល់គឺ Crystal Palace ផងដែរ។
អ្នកផ្សេងទៀតគឺ Ian Maatsen ដែលកីឡាករហូឡង់រូបនេះ ទើបតែទទួលបានពេលវេលាឈរជើងលើទីលាន ១៣០ នាទីគត់ ហើយទំនងមានក្លឹប Borussia Dortmund បាក់ចិត្តមកលើយុវជនលេងតំណែងការពារស្លាបខាងលើ។ ចុងក្រោយជា Madueke ដែល Chelsea ទើបតែយកបានកាលខែមករាដើមឆ្នាំពី PSV ឥឡូវ Pochettino មិនត្រូវចិត្ត ប្រើប្រាស់ទើបមួយប្រកួត ក៏ចង់លក់ចេញទៅវិញដូចគ្នា៕