អង្គការផ្កាយសមុទ្របានរៀបចំកម្មវិធីការប្រកួតបាល់ទាត់សប្បុរសធម៌លើកទី២ របស់ខ្លួនដែលប្រព្រឹត្តទៅដោយជោគជ័យកាលពីថ្ងៃទី១៧ ខែធ្នូ ឆ្នាំ២០២៣ និងបាននាំយកនូវភាពសប្បាយរីករាយ ទំនាក់ទំនងល្អរវាងគ្នាមានការចូលរួមចំណែកពីបណ្ដាក្រុមហ៊ុននានា ចំនួន១១ ផ្សេងៗគ្នា។
អ្នកស្រី ជួបវិច្ឆិកា អគ្គនាយិកាអង្គការផ្កាយសមុទ្រ ពិតជាមានអារម្មណ៍រំភើបរីករាយណាស់ដែលបានឃើញពីការចូលរួមយ៉ាងច្រើនកុះករពីសប្បុរសជនមកពីបណ្ដាក្រុមហ៊ុននានាប្រកបដោយទឹកចិត្តសប្បុរសធម៌ជួយរួមចំណែកក្នុងការងារសង្គម និងកាត់បន្ថយភាពក្រីក្រក្នុងប្រទេសកម្ពុជាតាមរយៈការផ្ដល់ឱកាសដល់កុមារក្រីក្រនូវឱកាសរៀនសូត្រដ៍មានគុណភាព និងជាពិសេសគឺចូលរួមលើកកម្ពស់វិស័យកីឡាបាល់ទាត់នូវប្រទេសយើងអោយកាន់តែរីកចម្រើនទៅមុនផងដែរ។
តំណាងអង្គារខាងលើនេះសូមថ្លែងអំណរគុណយ៉ាងជ្រាលជ្រៅដល់អ្នកទាំងអស់គ្នាសម្រាប់ការឧបត្ថម្ភគាំទ្រមិនអាចកាត់ថ្លៃបានចំពោះបេសកកម្មរបស់អង្គការផ្កាយសមុទ្រកន្លងមកនេះ។ កម្មវិធីប្រកួតបាល់ទាត់សប្បុរសធម៌លើកទី២ របស់អង្គការផ្កាយសមុទ្រឆ្នាំនេះពិតជាបានបង្កើតអនុស្សាវរីយ៍ថ្មីៗនិងល្អៗដល់ក្រុមបាល់ទាត់ចូលរួមទាំងអស់ដោយទន្ទឹមនឹងនេះបានពង្រឹងស្មារតីក្រុមពង្រីកទំនាក់ទំនងនិងបង្កើតវប្បធម៌ចែករំលែកក្នុងសង្គមកម្ពុជាទាំងមូលទៀតផង។
បញ្ជាក់ដែរថា ការប្រកួតបាល់ទាត់សប្បុរសធម៌របស់អង្គការផ្កាយសមុទ្រនេះធ្វើឡើងកាលពីថ្ងៃទី១៧ ខែធ្នូ ឆ្នាំ២០២៣ នៅទីលានហ្វឹកហាត់បាល់របស់អង្គការ។ ការប្រកួតបានការចូលរួមពីក្រុមចំនួន ១១ ដូចជា AIA Cambodia V-Grow FT Codingate FC CE&P Corporate Ltd Bokor Seniors We clean FC Reasey Krohom Spean Thmor United Flying Tigers Athireach Thmor និង Together make a happy life for kids៕