ខ្សែការពារឆ្នើមរបស់ក្លិប Bayern Munich កីឡាករ Matthijs de Ligt ត្រូវបានគេរាយការណ៍ថា បានក្លាយជាគោលដៅកំពូលមួយរបស់ក្លិបកាំភ្លើងធំ Arsenal នៅក្នុងទីផ្សារដោះដូរខាងមុខ។
ជាក់ស្តែង កីឡាករវ័យ ២៤ឆ្នាំរូបនេះ បានចូលរួមជាមួយក្រុម Bayern ពី Juventus ក្នុងខែកក្កដា ឆ្នាំ ២០២២ ដោយគេបានបង្ហាញខ្លួន ៥៤ លើកសម្រាប់ក្រុម Munich គ្រប់ការប្រកួតទាំងអស់ និងរកបាន ៤ គ្រាប់។
យ៉ាងណាមិញ De Ligt នៅតែសល់រយៈពេលជាង ៣ឆ្នាំទៀតដើម្បីដំណើរការកុងត្រារបស់គេនៅទឹកដី Allianz Arena ចំពេលបច្ចុប្បន្នកំពុងមានការរំពឹងទុកជាច្រើន ជុំវិញអនាគតរបស់គេជាមួយ Bayern ។
ហើយឥឡូវនេះ បើយោងតាមសារព័ត៌មាន The Athletic បានបង្ហាញឲ្យដឹងថាក្លិប Arsenal កំពុងតាមដានយ៉ាងដិតដល់ចំពោះស្ថានភាពរបស់ De Ligt នៅកីឡដ្ឋាន Allianz Arena ក្នុងគោលបំណងធ្វើការផ្ទេរដែលអាចទៅរួចមួយនៅឆ្នាំក្រោយ។
ប្រភពដដែលនេះ បានអះអាងទៀតថាការផ្ទេរនៅខែមករា ហាក់ជារឿងដែលមិនអាចទៅរួចនោះទេ ខណ:ក្រុមរបស់លោក Mikel Arteta មានទំនុកចិត្តថាកិច្ចព្រមព្រៀងមួយ អាចត្រូវសម្រេចបាននៅអំឡុងពេលទីផ្សាររដូវក្តៅឆ្នាំក្រោយ ៕