អតីតខ្សែបម្រើក្លិប Real Madrid និង Arsenal កីឡាករ Mesut Ozil បានសម្តែងការសរសើរយ៉ាងខ្លាំងទៅលើ Antonio Rudiger បន្ទាប់ពីខ្សែការពាររូបនេះ បានក្លាយជាវីរបុរសសម្រាប់ក្រុម ក្នុងការនាំយកជ័យជម្នះទៅលើ RCD Mallorca កាលពីយប់មិញ។
Rudiger ដែលបានចាកចេញពី Chelsea និងផ្ទេរមកចូលរួមជាមួយ Madrid កាលពីឆ្នាំ ២០២២ បានក្លាយជាផ្នែកដ៏សំខាន់បំផុតមួយ នៅក្នុងតំបន់ការពាររបស់ក្រុមលោក Carlo Ancelotti ខណ:ថ្មីៗនេះ គេថែមទាំងបានរកគ្រាប់បាល់ជ័យជម្នះជួយឲ្យ Madrid ដើម្បីរក្សាតំណែងកំពូលតារាង ថែមទៀតផង។
យ៉ាងណាមិញបន្ទាប់ពីការបង្ហាញគុណផលលេងដ៏ល្អរបស់ខ្សែការពារកណ្តាលសញ្ជាតិអាល្លឺម៉ង់រូបនេះ Ozil បាននិយាយថាបច្ចុប្បន្ននេះ គេគឺជាខ្សែការពារល្អបំផុតមួយក្នុងពិភពលោក និងថែមទាំងបានបង្ហោះសារលើបណ្តាញសង្គម Xថា៖
“Prime Toni Rüdiger គាត់គឺជាខ្សែការពារល្អបំផុតរបស់ពិភពលោកនៅពេលនេះ។គាត់មានរដូវកាលមិនគួរឱ្យជឿសម្រាប់អតីតក្លិប Real Madrid របស់ខ្ញុំ។ អ្នកក៏អាចសួរ Haaland ឬ Osimhen បាន ថាតើគាត់ល្អប៉ុណ្ណា! មើលអ្វីដែលបានកើតឡើងជាមួយ Chelsea បន្ទាប់ពីគាត់បានចាកចេញទៅ ថាតើពួកគេដុនដាបប៉ុណ្ណា ” ៕