ខ្សែបម្រើក្រុម Newcastle United កីឡាករ Joelinton បានជួបនូវដំណឹងដ៏រន្ធត់ ដោយសារក្រុមចោរបានគាស់ផ្ទះរបស់គាត់ នៅ Northumbria នៅពេលដែលក្រុមសារិកាព្រៃ កំពុងប្រកួតជាមួយក្រុម Manchester City នៅកីឡដ្ឋាន St James’ Park កាលពីថ្ងៃអាទិត្យ។
កីឡាករប្រេស៊ីល បានរងរបួស ប៉ុន្តែបានស្ថិតនៅកីឡដ្ឋានដើម្បីទស្សនាការប្រកួត ដែល Newcastle ចាញ់ដោយលទ្ធផល ២-៣ ។ Joelinton បានទទួលដំណឹងអំឡុងពេលមើលការប្រកួត ដោយចោរបានចូលទៅក្នុងផ្ទះរបស់គាត់។ ក្រុមចោរបានរត់គេចខ្លួនបាត់មុនពេលប៉ូលិសបានទៅដល់។ មិនមានការបញ្ជាក់ពីទ្រព្យសម្បត្តិដែលបាត់បង់នោះទេ។
ការលុកលុយក្នុងផ្ទះរបស់កីឡាករ Premier League រូបនេះ បានកើតឡើងតែប៉ុន្មានសប្តាហ៍ក្រោយក្រុមចោរបានទម្លាយចូលផ្ទះរបស់កីឡាករ Jack Grealish របស់ Manchester City ។
សមាជិកគ្រួសាររបស់ Grealish និងមិត្តស្រីរបស់គាត់ Sasha Attwood បានស្ថិតនៅក្នុងផ្ទះ ខណៈ Man City កំពុងប្រកួតជាមួយ Everton កាលពីថ្ងៃទី២៧ ខែធ្នូ។ គ្រឿងអលង្ការ និងនាឡិកាមានតម្លៃជាង ១ លានផោន បានបាត់បង់៕