ក្លិប Tottenham Hotspur ថ្មីៗនេះ ត្រូវបានគេរាយការណ៍រាយការណ៍មកថា បានច្រានចោលសំណើផ្តល់ជូនសម្រាប់កីឡាករ Emerson Royal ពីសំណាក់ក្លិបអារ៉ាប៊ីសាអូឌីត Al-Nassr របស់ Cristiano Ronaldo ។
ជាក់ស្តែង ក្រៅតែពីបានបន្ថែមកីឡាករចំណូលថ្មីមួយចំនួនរួចហើយ ក្លិប Spurs ក៏បានឃើញកីឡាករមួយចំនួនរបស់ខ្លួន ចាកចេញពីក្លិបវិញផងដែរ ដូចជា Hugo Lloris, Eric Dier, Djed Spence, Japhet Tanganga និង Ashley Phillips ជាដើម។
ទន្ទឹមនឹងនេះ Emerson បានក្លាយជាកីឡាករចុងក្រោយគេឋដែលត្រូវបានផ្សារភ្ជាប់ញឹកញាប់ជាមួយនឹងការចាកចេញពីក្លិបដែលមានមូលដ្ឋាននៅភាគខាងជើងទីក្រុងឡុងដ៍នេះផងដែរ។
ហើយឥឡូវនេះ បើយោងតាម talkSPORT បានអះអាងថា Tottenham បានសម្រេចធ្វើការច្រានចោលសំណើផ្តល់ជូនចំនួន ២១លានផោនពីសំណាក់ក្រុមអារ៉ាប៊ីសាអូឌីត Al-Nassr សម្រាប់ខ្សែការពារវ័យ ២៥ឆ្នាំ។
ជម្រាបជូនផងដែរថា Al-Nassr ហាក់បីដូចជាចង់បន្ថែមសមាជិកថ្មី មកកាន់ក្រុមរបស់ពួកគេ ដោយភាគច្រើនបានជ្រើសរើសយកកីឡាករពីលីគក្នុងតំបន់អឺរ៉ុប នៅក្នុងទីផ្សារដោះដូរកីឡាករចុងក្រោយ ដោយក្នុងនោះរួមមានទាំងខ្សែប្រយុទ្ធកំពូល Cristiano Ronaldo ផងដែរ៕