ក្លិបបិសាចក្រហម Manchester United ត្រូវបានគេរាយការណ៍មកថា កំពុងត្រៀមខ្លួនរួចជាស្រេចហើយក្នុងការរុះរើក្រុមទ្រង់ទ្រាញធំ នៅទីផ្សាររដូវក្តៅខាងមុខនេះ ខណ:ពេលដែលម្ចាស់ភាគហ៊ុនថ្មី គឺលោក Sir Jim Ratcliffe បានចូលមកគ្រប់គ្រងក្លិបពេញលេញ។
លោក Ratcliffe ត្រូវបានគេដឹងថា នឹងមកគ្រប់គ្រងរាល់ប្រតិបត្តិការទាំងអស់នៅក្នុងក្រុម ដោយក្នុងនោះ លោកក៏កំពុងសម្លឹងរកមើលការផ្លាស់ប្តូរដ៏ធំមួយផងដែរ ខណ:បើតាមការចុះផ្សាយពី Manchester Evening News បានរាយការណ៍មកថា Man United អាចនឹងបញ្ចេញកីឡាកររបស់ខ្លួនដល់ទៅ ១០រូបឯណោះ នៅចុងបញ្ចប់រដូវកាលនេះ។
ជាការពិតណាស់ ទាំង Raphael Varane, Anthony Martial និង Tom Heaton សុទ្ធតែត្រៀមចាកចេញនៅពេលកុងត្រារបស់ពួកគេត្រូវផុតកំណត់ក្នុងខែមិថុនាខាងមុខ ខណៈ Aaron Wan-Bissaka, Victor Lindelof និង Facundo Pellistri ក៏បានឈានដល់ ១២ខែចុងក្រោយនៃកិច្ចសន្យារៀងៗខ្លួនផងដែរ។
ដោយឡែក Mason Greenwood ក៏ត្រូវបានគេរំពឹងថាអាចនឹងចាកចេញផងដែរ ដោយបច្ចុប្បន្នកំពុងទទួលបានការចាប់អារម្មណ៍ខ្លាំងពីសំណាក់ក្លិបធំៗដូចជា Barcelona និង Atletico Madrid ខណ:ពេលដែលគេកំពុងលេងក្រោមលក្ខខណ្ឌខ្ចីជើងនៅក្លិប Getafe ។
ខ្សែប្រយុទ្ធផ្សេងទៀតដែលអាចនឹងចាកចេញដែរនោះគឺ Marcus Rashford និង Antony នៅពេលដែលពួកគេសុទ្ធសឹងតែបានជួបប្រទះនឹងការលំបាករៀងៗខ្លួននៅក្នុងក្លិប នាពេលបច្ចុប្បន្ន ស្របពេល ខ្សែបម្រើដែលមានបទពិសោធជោគជាំ Casemiro ក៏អាចចាកចេញផងដែរ ដោយក្លឹបនានាក្នុងប្រទេសអារ៉ាប៊ីសាអូឌីតសុទ្ធសឹងតែបានបង្ហាញចំណាប់អារម្មណ៍។
ទន្ទឹមនឹងនេះដែរទាំង Jadon Sancho, Donny van de Beek, Hannibal Mejbri និង Alvaro Fernandez ដែលបច្ចុប្បន្នកំពុងដាក់ឲ្យក្លិបដទៃខ្ចីជើង ក៏ទំនងជាត្រូវដាក់លក់ នៅក្នុងទីផ្សារដោះដូរនាពេលខាងមុខនេះផងដែរ៕