ក្លឹបអ្នកមានបុណ្យ Barcelona នឹងមិនចុះហត្ថលេខាទិញផ្តាច់ហួសពីលក្ខខណ្ឌខ្ចីជើង សម្រាប់ Joao Felix ចេញពី Atletico Madrid នៅទីផ្សារដោះដូររដូវក្តៅខាងមុខទេ ត្រង់កីឡាករព័រទុយហ្គាល់ហាក់មានតម្លៃផ្ទេរចេញខ្ពស់ជ្រុល ផុតពីការគ្រោងទុករបស់ក្លឹប។
ជាការពិតដូចបងប្អូនបានដឹង Felix គេមកចូលរួមជាមួយក្លឹបនៅតំបន់កាតាឡូញ៉ាក្នុងលក្ខខណ្ឌខ្ចីជើងកាលពី រដូវក្តៅ ហើយបើតាមសារព័ត៌មាន Marca ខាងក្លឹបអាណាព្យាបាល AT ហាក់ទាមទារតម្លៃខ្លួនរបស់គេ ៧០ ទៅ ៨០ លានអឺរ៉ូឯណោះ។ តួលេខនេះ វាលើសពីលទ្ធភាពនៃខ្ទង់ចំណាយរបស់ Barcelona ហើយសម្រាប់កីឡាករតែម្នាក់។
បូកផ្សំសព្វថ្ងៃគេរាងបាត់បង់ឱកាស ជាមួយការធ្លាក់ទម្រង់នៅពីក្រោយ Robert Lewandowski ផង ដូច្នេះប្រយុទ្ធប្រអប់វ័យក្មេងខាងលើ ពិតជាពិបាកនឹងចាប់យកឱកាសផ្ទេរមកចូលរួមពេញថ្លៃ។ នេះសរុបគេទើបរកបាន ៨ គ្រាប់និង Assist ២ លើកប៉ុណ្ណោះជូនក្លឹប។
គួរឲ្យដឹង កីឡាករកម្ពស់បាន ១,៨១ ម៉ែត្រ សព្វថ្ងៃសេសសល់កុងត្រារយៈពេលយូរដល់ចុងខែមិថុនា ឆ្នាំ ២០២៩ ជាមួយក្លឹបមេដឹកនាំដោយអ្នកចាត់ការលោក Diego Simeone។ ស្ថិតិនៅ Madrid ក្រហម ឯណោះ គេក៏ធ្វើបានល្អគួរសម ត្រង់ ១៣១ ប្រកួត រកបាន ៣៤ គ្រាប់និង Assist ១៨ លើក៕