បើតាមកាសែត Tuttosport ចុះផ្សាយ ក្លឹបបិសាចក្រហម Manchester United និងក្លឹបបីផ្សេងទៀត កំពុងទាក់ទងឃ្លាំមើលស្ថានភាពរបស់អ្នកចាត់ការលោក Simone Inzaghi នៅឯក្លឹប Inter Milan ដែលលោកត្រូវផុតនៅ ចុងខែមិថុនា ឆ្នាំ ២០២៥ បន្ទាប់ការចុះហត្ថលេខាចុងក្រោយនាខែកញ្ញា ឆ្នាំ ២០២៣។
បន្ទាប់ការមកដឹកនាំ លោកបានបត់ Inter ក្លាយទៅជាបិសាចដ៏កំណាចមួយប្រចាំដីអ៊ីតាលី ក៏ដូចទូទាំងដីអឺរ៉ុប។ ជាក់ស្តែងដូចនៅ Serie A ក្លឹបកំពុងនាំមុខដាច់ក្នុងតារាងមានដល់ ៦៩ ពិន្ទុ នេះយកឈ្នះពីលើសេះបង្កង់ Juventus ឈរលេខ ២ មានត្រឹម ៥៧ ពិន្ទុប៉ុណ្ណោះ ដោយឡែកនៅ UCL ក៏កំពុងស្ថិតក្នុងវគ្គ ១៦ ក្រុម ជើងទី ២ ផងដែរ។
បើតាមប្រភពចុះផ្សាយ មាន Chelsea, Man United, Barcelona និង Liverpool ដែលពិតជាបាក់ចិត្តលើ Inzaghi ជាខ្លាំង។ ក្លឹបទាំង ៤ សុទ្ធសឹងមានភាពមិនប្រាកដប្រជានៅកៅអីអ្នកចាត់ការ ហើយ ២ ក្នុងចំណោមនោះ ដូចហង្សក្រហមនិងអ្នកមានបុណ្យ ក៏ប្រកាសរួចរាល់អំពីគ្រោងចាកចេញរបស់គ្រូ នៅពេលខាងមុខ។
គួរឲ្យដឹងដែរថា ជាមួយការសេសសល់កុងត្រា ១ ឆ្នាំ ៤ ខែ នៅ Inter ម្ល៉េះបណ្តាក្លឹបចង់បាន Inzaghi ក៏ទាមទារការចំណាយលុយមួយផ្នែកជាចាំបាច់ដែរ ហើយអាចចូលខ្ទង់ ២០ ទៅ ៣០ លានអឺរ៉ូ ដើម្បី ផ្តាច់មុនកាលកំណត់។ បទពិសោធន៍កន្លងមក គ្រូវ័យ ៤៧ ឆ្នាំ ធ្លាប់តែដឹកនាំក្លឹបនៅអ៊ីតាលីមួយគត់ គឺ Lazio និង Inter នោះឯង៕