ឯកឧត្ដម វ៉ាត់ ចំរើន គណៈលេខាធិការនៃគណៈកម្មាធិការជាតិអូឡាំពិកកម្ពុជា (NOCC) ដាក់ទិសដៅធ្វើយ៉ាងណាជំរុញដល់កីឡាករ កីឡាការិនីរកមេដាយឲ្យបាន១គ្រឿងនៅព្រឹត្តិការណ៍អូឡាំពិកហ្គេម ឆ្នាំ២០៣២ នៅប៉ារីស។
ឯកឧត្ដម វ៉ាត់ ចំរើន បានឲ្យដឹងក្រោយរៀបចំមហាសន្និបាតបូកសរុបលទ្ធផលការងារ និងលើកទិសដៅសម្រាប់ឆ្នាំ២០២៤ របស់គណៈកម្មាធិការជាតិអូឡាំពិកកម្ពុជា (NOCC)ថា ក្នុងសេចក្ដីថ្លែងការណ៍ចុងក្រោយគឺធ្វើយ៉ាងណាជំរុញកីឡាករ កីឡាការិនីកម្ពុជារកមេដាយអូឡាំពិកឲ្យបាន១គ្រឿងពិសេសនៅការប្រកួតអូឡាំពិករដូវក្ដៅ ឆ្នាំ២០៣២ ទីក្រុងប៉ារីស។
អគ្គលេខាធិការខាងលើបន្ថែមទៀតថា បន្ទាប់ពីបញ្ចប់ការប្រកួតអូឡាំពិក ឆ្នាំ២០២៨ នៅអាមេរិករួចហើយនោះគឺ NOCC នឹងជំរុញឲ្យមានកីឡាករ កីឡាការិនីខ្មែរអាចឈានដល់ការប្រកួតជម្រុះឲ្យបានច្រើនប្រភេទកីឡា។ ហេតុដូចនេះប្រសិនបើកម្ពុជាមានកីឡាករ កីឡាការិនី អាចឈានដល់ការជម្រុះច្រើននោះលទ្ធភាពរកមេដាយបានក៏ច្រើនដូចគ្នាដែរ។
បញ្ជាក់ដែរថា គណៈកម្មាធិការជាតិអូឡាំពិកកម្ពុជា (NOCC) កាលពីថ្ងៃទី២ ខែមីនា ឆ្នាំ២០២៤ នេះបានធ្វើមហាសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ បន្តទៀតនៅពហុកីឡដ្ឋានមរតកតេជោ។ ជាមួយគ្នានោះដែរគឺមានការអញ្ជើញចូលរួមពីឯកឧត្ដម ថោង ខុន ប្រធាន NOCC ឯកឧត្ដម វ៉ាត់ ចំរើន និងថ្នាក់ដឹកនាំ តំណាងសហព័ន្ធកីឡាជាតិជាច្រើនបានចូលរួម៕