ក្លឹបបាល់ទះស្នងការដ្ឋាននគរបានខេត្តត្បូងឃ្មុំ បានលើកពាន Wurkz Special Volleyball Cup 4×4 នៅភូមិភាគខេត្តកំពង់ចាម ក្រោយឈ្នះក្លឹបបាល់ទះស្នងការដ្ឋាននគរបាលខេត្តកំពង់ចាមវគ្គផ្ដាច់ព្រ័ត្រ ក្នុងលទ្ធផល២សិតទល់១សិត នៅសាលសាលាខេត្តកំពង់ចាម ក្រោមក្រសែភ្នែកអ្នកទស្សនារាប់រយនាក់ កាលពីថ្ងៃទី១០ ខែមីនា ឆ្នាំ២០២៤។
ជួបស្នងការដ្ឋាននគរបាលខេត្តកំពង់ចាមដែលជាក្រុមខ្លាំង ស្នងការដ្ឋាននគរបាលខេត្តត្បូងឃ្មុំ បានប្រើយុទ្ធសាស្រ្តលេងបុកស្មាត់ឆ្វេងស្ដាំ។ កីឡាករមួយរូបរបស់ត្បូងឃ្មុំ ផន ពិសាល បានលើកឡើងថា ក្រុមរបស់គេបានចាត់ទុក ឌិន ស៊ីដែន ជាមុខសញ្ញាទទួលសេវាដ៏សំខាន់ ដើម្បីកាត់បន្ថយកម្លាំងប្រយុទ្ធរបស់ពួកគេ។
កីឡាករល្អក្នុងការកាងសេវាកណ្ដាលដដែល បានទម្លាយក្រោយចប់ការប្រកួតដូច្នេះថា ៖«ចំណុចខ្សោយរបស់ខាងកំពង់ចាម បើតាមខ្ញុំគិតដោយសារខ្ញុំភាគច្រើនខ្ញុំវ៉ៃគេចបងបងដែលនៅកណ្ដាល ខ្ញុំភាគច្រើនវ៉ៃទៅបងឆ្វេង បងស៊ីដែនហើយនឹងស្ដាំដោយសារគាត់ចាប់ម៉ូវេរៀងច្រើន កាលណាចាប់ម៉ូវេច្រើនគាត់ចែកបាល់មិនសូវបាន»។
កាលពីថ្ងៃទី១០ ខែមីនា ឆ្នាំ២០២៤ កីឡាករត្បូងឃ្មុំរូបនេះ បានការពារជើងក្រោមយ៉ាងល្អខ្លាំងណាស់។ ឌិនស៊ីដែនស្មាត់ធំរបស់កំពង់ចាមម៉ាត់ធ្ងន់ៗមែន ទែន ប៉ុន្តែពិសាលនៅតែថ្នក់បាល់ឡើងលើស្អាតៗធ្វើឲ្យអ្នកទស្សនាហ៊ោផ្អើលសាលសាលាខេត្តកំពង់ចាម។ មិនត្រឹមតែពិសាលតែម្នាក់ទេ ពោលគឺក្រុមស្នងការខត្តត្បួងឃ្មុំ លេងសង់តង់គ្នាល្អទាំងអស់តែម្ដង។
ក្លឹបបាល់ទះស្នងការដ្ឋាននគរបាលខេត្តត្បូងឃ្មុំ និងស្នងការដ្ឋាននគរបាលខេត្តកំពង់ចាម នឹងត្រូវឡើងទៅប្រកួតធំ Wurkz Special Volleyball Cup 4×4 នៅភ្នំពេញនៅថ្ងៃទី ២២ ដល់ថ្ងៃ ២៨ ខែមេសា ឆ្នាំ២០២៤ខាងមុខ។
ដោយឡែកចំណាត់ថ្នាក់លេខបីនិងលេខបួន មិនមានកៅអីឡើងទៅប្រកួតនៅភ្នំពេញទេ។ ចំណាត់ថ្នាក់លេខបីបានលើស្នងការដ្ឋាននគរបាលខេត្តមណ្ឌលគិរី ទទួលបានប្រាក់២លានរៀល និងចំណាត់លេខបីបានលើក្លឹបបាល់ទះយុវជនមិត្តភាព ទទួលបានប្រាក់រង្វាន់១លានរៀល៕