យោងតាមរបាយការណ៍ចុងក្រោយមួយ បានបង្ហាញឱ្យដឹងថា ថ្នាក់ដឹកនាំរបស់ក្លិបបិសាចក្រហម Manchester United ឥឡូវនេះ កំពុងធ្វើការពិចារណាជុំវិញការរកអ្នកមកជំនួសតំណែងរបស់លោក Erik ten Hag ។
ជាការពិតណាស់ លោក Ten Hag បច្ចុបន្ន កំពុងស្ថិតនៅក្រោមសម្ពាធកាន់តែខ្លាំង បន្ទាប់ពីក្រុម Man United បានរងការបរាជ័យមួយផ្សេងទៀត នៅទឹកដី Old Trafford កាលពីថ្ងៃពុធ ដោយត្រូវបានទម្លាក់ចេញពីពានរង្វាន់ Carabao Cup ក្រោមថ្វីជើងរបស់ Newcastle ។
ហើយឥឡូវនេះ យោងទៅតាមកាសែត The Times បានបង្ហាញថា ក្លិប Man United កំពុងពិចារណារកអ្នកថ្មី មកជំនួស Ten Hag នៅពេលដែលថ្នាក់ដឹកនាំរបស់ក្លិប ក៏កំពុងសម្លឹងឃើញជម្រើសសក្តិសមមួយចំនួន នៅក្នុងចិត្តរួចហើយផងដែរ។
ប្រភពដដែលនេះ បានអះអាងទៀតថាគ្រូបង្វឹករបស់ក្លិប Sporting គឺលោក Ruben Amorim និង Zinedine Zidane បានក្លាយជាបេក្ខភាពកំពូលពីររូប ដែលក្លិប Man Utd កំពុងពិចារណាយកមកដឹកនាំក្រុមរបស់ខ្លួន។
ជម្រាបជូនផងដែរថា ចំពោះ Zidane បានឈប់ពីការងារ ចាប់តាំងពីលោកបានចាកចេញពី Real Madrid ក្នុងខែឧសភា ឆ្នាំ ២០២១ មក ហើយកាលពីឆ្នាំមុនបុរសសញ្ជាតិបារាំងរូបនេះ ធ្លាប់បានបដិសេធសំណើពីក្រុម Man Utd ម្តងរួចមកហើយ ដោយសារតែលោកមិនសូវស្ទាត់និយាយភាសាអង់គ្លេស ៕