ស្ថានភាពរបស់យុវជនឆ្នើមបារាំង Kylian Mbappe មើលទៅត្រូវអូសបន្លាយដល់អស់កុងត្រានាបញ្ចប់រដូវកាលខាងមុខនោះឯង បន្ទាប់តែមិនមានដំណឹងវិជ្ជមានក្នុងការបន្តកុងត្រាថ្មីជាមួយក្លឹបអាណាព្យាបាលសព្វថ្ងៃ Paris Saint-Germain។
ក្លឹបជាច្រើនហាក់ដាក់គោលដៅមកលើខ្សែប្រយុទ្ធវ័យ ២៤ ឆ្នាំ នេះរួមទាំងអតីតគ្រូចាស់លោក Thomas Tuchel ដែលកំពុងដឹកនាំក្លឹប Bayern Munich សព្វថ្ងៃផងដែរ។ ប្រាប់ទៅកាសែត Canal+ គ្រូសញ្ជាតិបារាំង លើកឡើង៖ “Mbappe គេនឹងស្ថិតក្នុងលក្ខខណ្ឌឥតគិតថ្លៃនៅឆ្នាំក្រោយ? ជាការពិត គេនឹងមកលេងឲ្យពួកយើង Kylian គឺជា Kylian គេឈ្លាសវៃណាស់កីឡាករម្នាក់នេះ”។
លោកបន្ត៖ “ពួកយើងមានទំនាក់ទំនងល្អនឹងគ្នា បើគេចង់មកចូលរួមនៅ Bayern ខ្ញុំនឹងព្រម នឹងទទួលយកគេមកចូលរួម ហើយបើគេចង់ទទួលបានអ្វីមួយ ក៏គេនឹងទទួលបានវាដែរ”។ គួរឲ្យដឹងថា ម្ចាស់អាវលេខ ៧ ក៏បន្តធ្វើព្យុះភ្លៀងជាមួយក្លឹបក្នុងទីក្រុងប៉ារីស តាមរយៈការបង្ហាញខ្លួនសរុប ១៥ ប្រកួត រកបាន ១៥ គ្រាប់និង Assist ១ លើក។
គោលដៅចាស់ជាមួយ Real Madrid ហាក់ត្រូវបានកាត់ផ្តាច់បន្ទាប់ចែចូវ ២ ឆ្នាំមិនបានសម្រេច។ ផ្ទុយទៅវិញ មានតែសម្លឹងការផ្ទេរទៅទ្រនំបន្ទាប់អាចជា Man United ក្នុងចចាមអារ៉ាមប្រជែងរវាង Bayern នោះឯង។ ផ្ទុយមកវិញខាងអធិរាជស ហាក់បត់គោលដៅសម្លឹងចង់បាន Erling Haaland របស់ Man City ជំនួស៕