នៅរយៈពេលប៉ុន្មានឆ្នាំចុងក្រោយ Barcelona បានជួបបញ្ហាចាត់តាំងអ្នកចាត់ការរយៈពេលយូរ ជារួមតែងដកចេញដាក់ចូលថ្មីបន្តបន្ទាប់ រាប់តាំងជំនាន់ Ernesto Valverde អស់តំណែងកាលខែមករា ឆ្នាំ ២០២០។ បន្តមកនេះ ពុំមានអ្នកចាត់ការណាដឹកនាំក្លឹបបានយូរជាង ២ ឆ្នាំ ទើបតែមកដល់ Xavi Hernandez។
រាប់ថា Xavi ជោគជ័យ ដ្បិតបានជួយក្លឹបកាន់ពាន La Liga និង Spanish Super Cup ហើយតាមការជឿជាក់របស់កីឡាករក្នុងក្រុម Fermin Lopez បានសង្កត់ធ្ងន់ថា គ្រូសញ្ជាតិអេស្ប៉ាញរំពឹងនឹងអាចក្លាយជា Sir Alex Ferguson នៅទឹកដី Camp Nou សម្រាប់ពេលវេលាតទៅមុខ។
ប្រាប់ទៅ El 10 del Barca យុវជន Lopez លើកឡើង៖ “ខ្ញុំសង្ឃឹមថា Xavi នឹងក្លាយជា Sir Alex Ferguson សម្រាប់ក្លឹប Barcelona គាត់ជាមនុស្សម្នាក់ដែលផ្តល់ភាពជឿទុកចិត្តដល់ខ្ញុំ និងឱកាសឲ្យខ្ញុំរស់នៅភាពជាខ្លួនឯងពេលឥឡូវនេះ ខ្ញុំពិតជារីករាយណាស់”។
រំឭកថា Ferguson បានចាយពេល ២៧ ឆ្នាំដឹកនាំក្លឹប Man United ដល់កើតជាអ្នកចាត់ការដ៏គួរឲ្យចងចាំមួយក្នុងប្រវត្តិសាសស្រ្តបាល់ទាត់។ ម្ល៉េះហើយ Xavi ក៏អាចធ្វើបាន ក្នុងករណីបន្តតំណែងរបស់ខ្លួន និងជម្នះអស់រាល់បញ្ហា ដ្បិតបើថ្មីថ្មោងទើបស្គាល់បរាជ័យមួយទៀតហើយក្រោមថ្វីជើង Girona ២-៤៕