ក្លិបបិសាចក្រហម Manchester United ត្រូវបានគេប្រាប់ថា Real Madrid នឹងមិនពិចារណាលក់ខ្សែប្រយុទ្ធឆ្នើមរបស់ខ្លួន កីឡាករ Vinicius Jr ក្រោមតម្លៃខ្លួន ២១៥លានផោននោះឡើយ។
ជាក់ស្តែងកាលពីពេលថ្មីៗនេះ មានរបាយការណ៍ជាច្រើនបានរាយការណ៍មកថា អនាគតរបស់កីឡាករសញ្ជាតិប្រេស៊ីល ហាក់កំពុងស្ថិតនៅក្នុងភាពសង្ស័យ ជាមួយនឹងក្លិប Man Utd បានបង្ហាញចំណាប់អារម្មណ៍ខ្លាំង ក្នុងការនាំយករូបគេមកកាន់ទឹកដី Old Trafford ។
ទន្ទឹមនឹងនេះ វាត្រូវបានគេរាយការណ៍ទៀតថា ក្លិប Madrid ក៏ហាក់ដូចជាពិចារណាក្នុងការលក់ Vinicius ចេញផងដែរ ដើម្បីបង្ក្រប់លុយក្នុងការនាំយកខ្សែប្រយុទ្ធ Kylian Mbappe មកបំពេញតំណែងនេះវិញ។
ប្រភពពី Defensa Central បានរាយការណ៍ថា ក្លិប Man Utd កំពុងត្រៀមខ្លួនរួចជាស្រេចហើយក្នុងការផ្តល់ជូនសំណើទឹកប្រាក់ចំនួន ១៣០លានផោន សម្រាប់ Vinicius ប៉ុន្តែបើតាម EPSN ថ្មីៗនេះ បានអះអាងថាក្លិប Madrid នឹងមិនលក់តារាឆ្នើមរបស់ខ្លួនដាច់ខាត ប្រសិនបើពួកគេទទួលបានសំណើតិចជាង ២១៥លានផោននោះ៕