គ្រូបង្វឹកលោក Carlo Ancelotti ថ្មីៗនេះ បានចេញមុខបដិសេធថាក្លិប Real Madrid មិនដែលគិតចង់បានខ្សែប្រយុទ្ធឆ្នើមរបស់ក្រុម Napoli កីឡាករ Victor Osimhen នៅក្នុងទីផ្សារដោះដូរកីឡាករ រដូវក្តៅនេះនោះឡើយ។ ជាក់ស្តែងកីឡាករសញ្ជាតិនីហ្សេរីយ៉ារូបនេះ ត្រូវបានផ្សារភ្ជាប់យ៉ាងខ្លាំងទៅនឹងការផ្លាស់ប្តូរទៅកាន់កំពូលៗជាច្រើន នៅអឺរ៉ុបដូចជា Manchester United, Bayern Munich, Chelsea និង Paris Saint-Germain ជាដើម។
ហើយមិនតែប៉ុណ្ណោះ Madrid ក៏ត្រូវបានគេភ្ជាប់ទៅនឹង Osimhen ផងដែរ ដោយសារតែក្រុមយក្សអេស្ប៉ាញមួយនេះ ចង់បានជម្រើសខ្សែប្រយុទ្ធថ្មី ដើម្បីមកជំនួសតំណែងរបស់ Karim Benzema ដែលបានទៅចូលរួមជាមួយក្រុមនៅអារ៉ាប៊ីសាអូឌីត ។
ទោះបីជាយ៉ាងណាក៏ដោយ ឥឡូវនេះ Ancelotti បានចេញមុខបិទពាក្យចចាមអារ៉ាមទាំងនោះ វិញ ដោយនិយាយថា ក្លិបមិនដែលពិចារណាលើការចុះហត្ថលេខាលើ Osimhen ទេ បើទោះបីជាគេជាខ្សែប្រយុទ្ធដ៏ល្អបំផុតមួយ នៅក្នុងពិភពលោកនាពេលបច្ចុប្បន្នក៏ដោយ។
លើសពីនេះ គ្រូបង្វឹកសញ្ជាតិអ៊ីតាលី បាននិយាយថា ៖ ” Osimhen គឺជាខ្សែប្រយុទ្ធដ៏ខ្លាំងបំផុតម្នាក់នៅអឺរ៉ុប ប៉ុន្តែនិយាយដោយស្មោះត្រង់ យើងមិនដែលគិតអំពីគាត់ទេ។ យើងសម្រេចចិត្តជំនួស Benzema ក្នុងវិធីមួយផ្សេងទៀត ជាមួយនឹងការមកដល់របស់ Bellingham” ៕