ទីផ្សារដោះដូរកីឡាករបានបិទទ្វារចប់សព្វគ្រប់ហើយ រាល់ដំណើរការចរចាទាំងអស់ នឹងត្រូវលើកទៅសម្រេចម្តងទៀត នាកំឡុងខែមករាខាងមុខ ចំទីផ្សាររដូវរងា។ ងាកមកមួយក្នុងចំណោមចចាមអារ៉ាមគួរឲ្យចាប់អារម្មណ៍ ពាក់ព័ន្ធអនាគតមិនប្រាកដប្រជារបស់ Bernardo Silva ដែលពេលនេះ គឺបន្តនៅក្លឹបមេ Man City។
យ៉ាងណាសារថយក្រោយ កំឡុងពេលកីឡាករចង់ចាកចេញ ក៏មានក្លឹបយក្សនៅបារាំង Paris Saint-Germain ចាប់អារម្មណ៍មកលើគេ តែមិនទទួលបានជោគជ័យ ត្រង់ខាងក្លឹបចង់បាន ផ្តល់ឲ្យមិនសមស្របទៅតាមសំណើ នៃភាគីក្លឹបអាណាព្យាបាល។
បើតាមរបាយការណ៍ CBS ចុះផ្សាយ ខាងក្លឹបនៅ Ligue 1 ផ្តល់ឲ្យកីឡាករ ២ រូបជាថ្នូរ មាន Marco Verratti លេងបម្រើ និងអ្នកចាំទីវ័យក្មេង Gianluigi Donnarumma ដើម្បីតែប្តូរយកកីឡាករឆ្នើមព័រទុយហ្គាល់ Silva ម្នាក់ មកទឹកដីបារាំង។ ដល់តែចម្លើយខាងក្លឹបអង់គ្លេស គឺ No ត្រង់ចង់បានយុវជនបន្ថែមផ្សេងទៀត។
ខាងក្លឹបដឹកនាំដោយលោក Pep Guardiola សម្លឹងឃើញទេពកោសល្យកីឡាករវ័យ ១៧ ឆ្នាំ Warren Zaire-Emery ពោលចង់បាន ៣ ដូរ ១ តែខាងក្លឹប PSG បដិសេធ ទើបនាំឲ្យការចរចាទាំងមូលត្រូវបានលុបចោលទៅវិញ។ ណែនាំឲ្យស្គាល់កីឡាករលេងតំណែងបម្រើ Zaire-Emery បន្តិច គេទើបតែឡើងមកឈុតធំកាលរដូវក្តៅ ឆ្នាំទៅ ២០២២ តែហាងឆេងតម្លៃខ្លួនក៏មានល្បាក់ ២០ លានអឺរ៉ូដែរ៕