ក្លិបត្រកូល Manchester ទាំងពីរ ត្រូវបានគេរាយការណ៍មកថា សុទ្ធសឹងតែបានច្រានចោលឱកាសក្នុងការចុះហត្ថលេខាលើខ្សែប្រយុទ្ធ Joao Felix ពីក្រុម Atletico Madrid មុនរូបគេផ្ទេរទៅចូលរួមជាមួយ Barcelona ។
ជាការពិតណាស់ នៅចំពេលកំពុងមានភាពរកាំរកូសខ្លាំង រវាង Felix ជាមួយនឹងអ្នកចាត់ការក្រុម លោក Diego Simeone បានធ្វើឱ្យមានការឈានដល់កិច្ចព្រមព្រៀងក្នុងការអនុញ្ញាតឱ្យកីឡាករសញ្ជាតិព័រទុយហ្គាល់ ទៅចូលរួមជាមួយ Barca ក្នុងលក្ខខណ្ឌខ្ចីជើងរហូតដល់ឆ្នាំ ២០២៤ ។
យ៉ាងណាមិញ ដោយថ្លែងទៅកាន់ El Larguero លោក Futre ដែលជាអតីតកីឡាករព័រទុយហ្គាល់ បានបង្ហាញថាភ្នាក់ងាររបស់ Felix គឺលោក Mendes គឺជាអ្នកនៅពីក្រោយការផ្ទេររបស់កីឡាកររូបនេះ ទៅ Barcelona បន្ទាប់ពីគាត់បានបរាជ័យ ក្នុងការបញ្ចុះបញ្ចូលទាំងក្លិប Man United ឬ Man City ឱ្យនាំយក Felix ។
មិនតែប៉ុណ្ណោះ គាត់បាននិយាយទៀតថា ៖ ” នៅពេលដែល Joao និយាយថាគាត់សុបិនចង់លេងឱ្យ Barça ខ្ញុំបានទូរស័ព្ទទៅសួរ Mendes ភ្លាម។ យើងបានជជែកគ្នា ហើយប្រាប់គាត់ឱ្យព្យាយាមនិយាយជាមួយ Man Utd ដើម្បីជំរុញឱ្យមានការផ្ទេរ ប៉ុន្តែនៅទីបំផុត ពួកគេបានបដិសេធ រួមទាំង Man City ផងដែរ។ ហើយនៅទីបំផុតក្តីសុបិនរបស់ Felix ក៏បានក្លាយជាការពិត ” ៕