ជាការពិតអ្នកចាត់ការលោក Xabi Alonso សព្វថ្ងៃកំពុងបង្ហាញទម្រង់ដឹកនាំក្លឹបអាល្លឺម៉ង់ Bayer Leverkusen បានយ៉ាងល្អ តែពេលទៅមុខអាចនឹងមានការផ្លាស់ប្តូរ ដ្បិតមួយរយៈក្រោយក៏ល្ហិចល្ហៀងចចាមអារ៉ាមអាចវិលទៅក្លឹបចាស់ ដូច Real Madrid ជាដើម។
យ៉ាងណាការផ្សារភ្ជាប់ទៅក្លឹបហង្សក្រហម Liverpool ជាអតីតក្លឹបមួយដែរនោះ ក៏មានដូចគ្នា ហើយវាស្ថិតក្នុងកិច្ចព្រមព្រៀងតាំងពីដំបូង នៅថ្ងៃដែលបុរសសញ្ជាតិអេស្ប៉ាញ បានចុះហត្ថលេខាក្លាយជាអ្នកចាត់ការឲ្យក្លឹបខាងលើ។
បើតាមសារព័ត៌មាន Bild ចុះផ្សាយ បើទោះបី Alonso ជាប់កុងត្រានៅ Leverkusen តែក្នុងពេលវេលានៃរដូវក្តៅខាងមុខ គឺលោកអាចមានជម្រើសអាទិភាព ចាកចេញទៅដឹកនាំ Liverpool ដោយចិត្តឯងបាន ពោលមិនចាំបាច់ឆ្លងកាត់ការចរចារវាងភាគីក្លឹបអាណាព្យាបាលឡើយ។ មានន័យថា បើទៅថ្ងៃមុខ Jurgen Klopp អស់តំណែងនៅ Anfield នោះ Alonso អាចពិចារណាលើឱកាសនោះបានភ្លាមៗ។
គួរឲ្យដឹងថាបុរសវ័យ ៤១ ឆ្នាំចាប់ចូលមកដឹកនាំក្លឹបអាល្លឺម៉ង់នៅថ្ងៃទី ០៥ តុលា ឆ្នាំ ២០២២ ជាមួយសុពលភាពកុងត្រាដល់ចុងខែមិថុនា ឆ្នាំ ២០២៦។ នេះពេលវេលាដឹកនាំរដូវកាលថ្មី ឆ្លងកាត់ ១០ ប្រកួត ក៏ឈ្នះដល់ទៅ ៩ លើក ស្មើ ១ ចាញ់ ០ ពោលមិនទាន់ស្គាល់បរាជ័យនៅឡើយ៕