ខ្សែប្រយុទ្ធ Jadon Sancho និង Richarlison ស្ថិតនៅក្នុងបញ្ជីគោលដៅរបស់ក្លិបនៅអារ៉ាប៊ី សាអ៊ូឌីត នៅក្នុងទីផ្សារដោះដូរខែមករាខាងមុខ នេះបើយោងតាមការចុះផ្សាយរបស់ talkSPORT។
ប្រភពខាងលើ ធ្លាប់បានអះអាងកាលពីខែតុលាម្ដងរួចមកហើយថា ការផ្ទេរទៅអារ៉ាប៊ី សាអ៊ូឌីតជាជម្រើសដែលមានភាគរយខ្ពស់សម្រាប់ Sancho បន្ទាប់ពីគេលែងមានឱកាសបង្ហាញខ្លួនសម្រាប់ Manchester United ដោយសារមានជម្លោះជាមួយអ្នកចាត់ការ Erik ten Hag។
ខ្សែប្រយុទ្ធ Richarlison ក៏ជាកីឡាករគោលដៅយូរអង្វែងពីក្លិបនៅមជ្ឈឹមបូព៌ាផងដែរ ដោយក្លិប Al-Hilal អាចជាជម្រើសមួយប្រសិនបើកីឡាករប្រេស៊ីល ចង់ចាកចេញពីក្លិប Tottenham Hotspur។
កីឡាករវ័យ២៦ឆ្នាំ បង្ហាញខ្លួនបាន១០ប្រកួតសម្រាប់ក្លិបមាន់ខ្នាយមាសនារដូវកាលនេះ តែគេអាចរកគ្រាប់បាល់តែមួយគ្រាប់ប៉ុណ្ណោះនៅ Premier League ហើយគេក៏មិនមែនជាជម្រើសទី១ដែរ ក្នុងតំណែងខ្សែប្រយុទ្ធកណ្ដាលរបស់អ្នកចាត់ការ Ange Postecoglou៕