ក្លឹប Notthingham Forest បានបញ្ចប់តំណែងរបស់អ្នកចាត់ការ Steve Cooper បន្ទាប់ពីមិនទទួលបានលទ្ធផលល្អជាបន្ដបន្ទាប់ ខណៈលោក Nuno Espirito Santo ស្ថិតនៅក្នុងបេក្ខភាពជួរមុខក្នុងការមកកាន់តួនាទីជាអ្នកចាត់ការថ្មីនៅទីនោះ។
យោងតាមប្រភពពី The Athletic បានរាយការណ៍ថា អតីតអ្នកចាត់ការរបស់ Wolves រូបនេះ ជាអ្នកជំនួសដ៏ល្អសម្រាប់តំណែងរបស់លោក Cooper សម្រាប់ការព្យាយាមចៀសពីតំបន់ត្រូវកាត់ចេញ។
លោក Cooper ត្រូវបានបញ្ចប់តំណែងជាអ្នកចាត់ការ Nottingham បន្ទាប់ពីទទួលបានជ័យជម្នះតែម្ដងប៉ុណ្ណោះ ក្នុងការលេង១៣ប្រកួតនៅក្នុងលីគ ហើយពួកគេឈរនៅលេខ១៧ក្នុងតារាង Premier League។
រំឭកថា លោក Cooper បានចូលកាន់តួនាទីជាអ្នកចាត់ការ Nottingham ក្នុងខែកញ្ញាឆ្នាំ២០២១ ដោយពួកគេកាលនោះឈរនៅបាតតារាងក្របខណ្ឌទី២ Championship។ ប៉ុន្ដែលោកបានផ្លាស់ប្ដូរស្ថានការណ៍នៅក្នុងក្រុម ហើយជួយពួកគេរហូតបានឡើងមកលីគកំពូលអង់គ្លេស នាដំណាច់រដូវកាលនោះ៕