អ្នកចាំទីក្លឹបបិសាចក្រហម Manchester United គឺ Andre Onana កំពុងស្ថិតក្នុងដំណើរស្នើសុំពន្យារពេលទៅកាន់សមាគមបាល់ទាត់កាមេរ៉ូន ក្នុងការត្រលប់ទៅជួយជម្រើសជាតិនៅពានរង្វាន់ African Nations Cup ត្រង់គេចង់បន្តជួយក្លឹបនៅ FA Cup នាប្រកួតសំខាន់ទល់ Wigan Athletic នៅថ្ងៃទី ០៨ មករាមួយទៀតសិន។
អ្នកចាំទីខាងលើ តាមថាបន្ទាប់ចប់ភារកិច្ចទល់ Nottingham Forest គេត្រូវវិលទៅប្រទេសកាមេរ៉ូនហើយ ដើម្បីជួបជុំហ្វឹកហាត់ត្រៀមប្រកួតពានប្រចាំទ្វីបអាហ្វ្រិក ខណៈកាលបរិច្ឆេទប្រកួតត្រូវចូលមកដល់ជុំទី ១ វគ្គចែកពូល នាថ្ងៃទី ១៦ មករា ទល់ហ្គីណេប៊ីសៅ។
បើតាមសារព័ត៌មាន ESPN ចុះផ្សាយ បុរសវ័យ ២៧ ឆ្នាំ គិតថាប្រកួតទល់ Wigan នាថ្ងៃទី ០៨ មករា វាមិនទាន់ជាហួសពេលអ្វីជ្រុលនោះទេ សម្រាប់ខ្លួនក្នុងការត្រលប់ទៅជួយជម្រើសជាតិ ណាមួយជំនួបនៅជុំទី ៣ FA Cup វាក៏រាប់ជាប្រកួតសំខាន់មួយដែរ។
បើសម្រេចក្លាយដូចចិត្តនោះ កីឡាករនឹងត្រូវបន្តជួយ Man United ដូចកាលបរិច្ឆេទខាងលើ តែនឹងត្រូវអវត្តមានពេញមួយខែមករាបន្ទាប់ ដូចជំនួបទល់ Tottenham ទល់ Wolves និងអាចខកខានការប៉ះ West Ham នាឯដើមខែកុម្ភៈផងដែរ៕