ក្លិប West Ham United ត្រូវបានគេរាយការណ៍មកថា បានបង្ហាញចំណាប់អារម្មណ៍ខ្លាំង ក្នុងនាំយកអតីតអ្នកចាត់ការក្រុមតោខៀវ Chelsea លោក Thomas Tuchel ត្រលប់មកកាន់ទឹកដី Premier League សារជាថ្មីម្តងទៀត។
ជាការពិតណាស់ ដោយស្ថិតនៅក្នុងស្ថានភាពដ៏លំបាកមួយនៅរដូវកាលនេះ ក្លិប West Ham ត្រូវបានគេរាយការណ៍មកថា កំពុងជ្រើសរើសយកគ្រូបង្វឹករបស់ក្លិប Bayern Munich ជាបេក្ខភាពដ៏ធំមួយ សម្រាប់មកជំនួសតំណែងរបស់លោក David Moyes ។
គួរឲ្យដឹងថា កិច្ចសន្យារបស់ Moyes ជាមួយក្លឹបដែលមានមូលដ្ឋាននៅទីក្រុងឡុងដ៍ គ្រោងនឹងផុតកំណត់នៅចុងបញ្ចប់នៃរដូវកាលនេះ ហើយបើយោងតាមរបាយការណ៍ពី HITC បានអះអាងថាក្លឹប West Hamហាក់គ្មានគម្រោងចង់បន្តកិច្ចសន្យាថ្មីណាមួយបន្ថែមទៀតនោះឡើយ។
ទន្ទឹមនឹងនេះ នាយកបច្ចេកទេសរបស់ក្លិប គឺលោក Tim Steidten ត្រូវបានគេនិយាយថាមានចំណាប់អារម្មណ៍ក្នុងការនាំយកគ្រូបង្វឹកល្បីឈ្មោះម្នាក់ មកកាន់ក្លិបរដូវក្តៅខាងមុខនេះ ហើយ Tuchel ត្រូវបានគេរាយការណ៍ថាកំពុងស្ថិតនក្នុងបញ្ជីគោលដៅរបស់លោក។
ជម្រាបជូនផងដែរថា លោក Tuchel បច្ចុប្បន្នហាក់កំពុងស្ថិតនៅក្នុងសម្ពាធយ៉ាងខ្លាំង ដោយក្រុម Bayern Munich បានជួបការលំបាកនាពេលថ្មីៗនេះ ក្រោយរងបរាជ័យ ៣ប្រកួតក្នុងលីគជាប់ៗគ្នា និងកំពុងតាមពីក្រោយក្រុមកំពូលតារាង ដល់ទៅ ៨ពិន្ទុឯណោះ៕