ខ្សែបម្រើ Bellingham បានរងរបួសកំភួនជើងក្នុងកំឡុងហ្វឹកហាត់ ដែលទំនងជាមិនអាចជាសះស្បើយទាន់ពេលវេលា ដើម្បីចូលរួមជាមួយអង់គ្លេសក្នុងការប្រកួត Nations League នាដើមខែកញ្ញា ឆ្នាំ២០២៤ បានទេ។
បើតាមការចេញផ្សាយរបស់ BBC បានឲ្យដឹងថា របួសនេះមិនទាន់ច្បាស់ថានៅពេលណាទើបជាសះស្បើយទេ ព្រោះត្រូវការពិនិត្យបន្ថែម។ យ៉ាងណាក្រុមការងាររបស់ BBC បានទទួលដំណឹងបណ្ដោះអាសន្នថា របួសនេះរហូតដល់ចុងខែកញ្ញា ទើបអាចជាសះស្បើយ ខណៈដែលការប្រកួតក្នុងពាន Nations League អង់គ្លេសមានភារកិច្ចក្នុងការប្រកួតទល់ សាធារណរដ្ឋអៀរឡង់ នៅថ្ងៃទី៧ ខែកញ្ញា និងមួយប្រកួតទៀតនៅថ្ងៃទី១០ ខែកញ្ញា នឹងត្រូវប៉ះ ហ្វាំងឡង់ ។
បើតាមស្ថានភាពទទួលបាន និងពេលវេលាដែលត្រូវប្រកួតជាក់ស្ដែងធ្វើឲ្យគេអាចវាយតម្លៃបានថា Bellingham នឹងអវត្តមានក្នុងក្រុមជម្រើសជាតិសម្រាប់ពានរង្វាន់ Nations League ខែក្រោយនេះ។ ជាមួយនឹងការរងរបួសនេះដែរខ្សែបម្រើវ័យ២១ឆ្នាំផ្ទាល់បាននិយាយថា «គ្មានអ្វីដែលធ្វើឲ្យខ្ញុំស្អប់ជាងការអវត្តមានក្នុងការប្រកួតនោះទេ ប៉ុន្តែរាងកាយរបស់ខ្ញុំវាបានប្រាប់ខ្ញុំថា វាត្រូវការពេលវេលាដើម្បីសម្រាកខ្លះបន្ទាប់ពីរវល់១ឆ្នាំពេញ»។