ថ្មីៗនេះ ខ្សែប្រយុទ្ធ Mohamed Salah បានបង្ហើបប្រាប់ពីឈ្មោះតារាឆ្នើមរបស់ក្រុម Manchester City គឺកីឡាករ Kevin De Bruyne ជាមិត្តរួមក្រុមដែលខ្លួនចង់បានបំផុត នៅក្នុងក្រុម Liverpool។
ជាការពិតណាស់ Salah មានឱកាសលេងជាមួយកីឡាករល្អៗជាច្រើន អំឡូងពេលរបស់ខ្លួន នៅទឹកដី Anfield និងថែមទាំងបានបង្កើតបានជាដៃគូប្រយុទ្ធដ៏មុតស្រួចបំផុតរួមជាមួយ Roberto Firmino និង Sadio Mane ដើម្បីផ្តល់ភាពជោគជ័យជាច្រើនសម្រាប់ក្រុមផងដែរ។
ហើយថ្មីៗនេះ កីឡាករ Darwin Nunez, Diogo Jota, Cody Gakpo និង Luis Diaz បានចូលមកជំនួសតារាឆ្នើមប្រេស៊ីល និងសេណេហ្គាល់ ដោយចាប់ដៃគូជាមួយ Salah នៅក្នុងប្រព័ន្ធប្រយុទ្ធជំនាន់ថ្មី សម្រាប់ក្រុមរបស់លោក Klopp។
តែទោះជាយ៉ាងណាក៏ដោយ នៅក្នុងបទសម្ភាសជាមួយ Sky Sports ថ្មីៗនេះ Salah បានជ្រើសរើសយកខ្សែបម្រើ De Bruyne របស់ក្រុម Man City ថាជាកីឡាករដែលខ្លួនចង់បានមកធ្វើជាមិត្តរួមក្រុមបំផុត។
មិនតែប៉ុណ្ណោះ នៅពេលត្រូវបានគេសួរថានរណាជាមិត្តរួមក្រុមក្នុងក្តីស្រមៃរបស់ខ្លួន ខណ: Salah បាននិយាយថា ៖ “Messi ឬ Ronaldo ប៉ុន្តែប្រសិនបើខ្ញុំជ្រើសរើសមួយនៅក្នុង Premier League នោះខ្ញុំនឹងជ្រើសរើស Kevin ។ គាត់មានចក្ខុវិស័យច្បាស់លាស់ ខ្ញុំប្រាកដថាគាត់អាចនឹងបញ្ជូនបាល់ឲ្យខ្ញុំបានគ្រប់ទីកន្លែង ដូច្នេះខ្ញុំនឹងនិយាយថា Messi , Ronaldo ហើយបន្ទាប់មក Kevin “៕